| زبان ادب و فرهنگ کردی مسائل مربوط به زبان و ادبیات و فرهنگ کردی از قبیل شعر داستان نوشته نقد بیوگرافی و ....
kurdish culture |
05-28-2012
|
 |
مدیر تاریخ و بخش فرهنگ و ادب کردی   |
|
تاریخ عضویت: Aug 2009
محل سکونت: مهاباد
نوشته ها: 19,499
سپاسها: : 3,172
3,713 سپاس در 2,008 نوشته ایشان در یکماه اخیر
|
|
چیرۆک....
چیرۆک ( 1 )
کاروان عومه‌ر کاکه‌سوور
پێشکه‌شه به‌و هاوڕێ یاریکه‌ره‌م، که به‌هاری 1982 له ستادیۆمی هه‌ولێر له به‌رچاوی ده‌یان که‌س گاڵته‌ی پێ کردم و پێی وتم: ((بڕۆ واز له تۆپ بێنه، چونکه تۆ نه له تۆپ تێده‌گه‌یت و نه ده‌زانیت شووتی لێ بده‌یت))... هه‌ر به ڕاستی له‌و کاته‌وه من نه‌متوانی یه‌ک شه‌قی دیکه له تۆپ هه‌ڵبده‌م و وازم له تیمه‌که‌مان هێنا، به‌ڵام ئه‌وه وای لێ نه‌کردم له خه‌یاڵی خۆمدا ده‌ست له یاریی فوتباڵ هه‌ڵبگرم.
له کاتێکدا ده‌ستت له‌ناو قوڕه‌که‌دایه و ده‌ته‌وێت ئه‌سپێک بۆ (ئالان)ی خوشکه‌زات دروست بکه‌یت، خۆشت نازانی بۆچی بیر له‌وه ده‌که‌یته‌وه، که تۆ ئه‌وه‌تا وا ته‌مه‌نت له چل تێده‌په‌ڕێت و هێشتا مناره‌ی چۆڵیت له نزیکه‌وه نه‌بینیوه... ئه‌و ترسه چییه له‌ناکاو ده‌خزێته گیانته‌وه...؟! نازانیت... ئه‌وه‌نده‌ت لا ڕوونه به منداڵی چیرۆکی سه‌یر سه‌یرت له‌باره‌ی مناره‌ی چۆڵییه‌وه بیستووه... هه‌مووشیان ترسناک، به‌ڵام چێژبه‌خشن... تۆ تاکه که‌سی گه‌ڕه‌کیت، ئه‌گه‌ر نه‌ڵێم تاکه که‌سی شاریت، که هه‌ر له دووره‌وه مناره‌ی چۆڵیت دیوه... هیچ له‌وه تێنه‌گه‌یشتوویت ئه‌و شته چییه به‌رده‌وام ڕێی لێ گرتوویت، که ڕۆژێک له ڕۆژان به ته‌نیا بێت، یان له‌گه‌ڵ هاوڕێکانتدا به پیاسه هه‌تا ئه‌وێ بچیت و چاوێ به به‌رزی و به تاق و به نه‌خشونیگاره‌کانیدا بگێڕیت... هه‌ر له چیرۆکی یه‌که‌مه‌وه زانیوته دوو ده‌رگای هه‌یه، چونکه کاتێ ئه‌ندازیاره‌که نه‌خشه‌ی ده‌کێشێت و به مه‌به‌ستی کۆکردنه‌وه‌ی زانیاریی زیاتر ده‌چێته هه‌نده‌ران، شاگرده‌که‌ی ده‌رفه‌ت ده‌هێنێت و هه‌ر خۆی هه‌ڵیده‌چنێت... کاتێک ئه‌ندازیار دێته‌وه و له دووره‌وه ده‌یبینێت، سه‌ری سووڕ ده‌مێنێت... هاوکات شێت و هار ده‌بێت... ده‌یه‌وێت بچێت شاگرده‌که‌ی بکوژێت، به‌ڵام ئه‌و دوو ده‌رگای بۆ کردووه، هه‌تا کاتێ وه‌ستا ئه‌ندازیاره‌که‌ی له یه‌کێکیاندا دێته ژوورێ، ئه‌و له‌وی دیکه‌یاندا بچێته ده‌رێ... تۆ به منداڵی نه‌تده‌زانی لای کامیان بگریت... ئایا کێ له‌سه‌ر هه‌قه...؟! ئه‌و ئه‌ندازیاره‌ی دوای ئه‌وه‌ی ناتوانێت شاگرده‌که‌ی بکوژێت و له داخان ده‌ستبه‌جێ گیانی ده‌رده‌چێت، یان ئه‌و شاگرده‌ی سه‌ری خۆی هه‌ڵده‌گرێت و بۆ هه‌تاهه‌تایه ده‌ربه‌ده‌ر ده‌بێت...؟! ئه‌گه‌رچی له چیرۆکه‌که‌دا ئه‌ندازیاره‌که له داخان گیانی ده‌رده‌چێت، به‌ڵام تۆ وه‌ک بڵێی ڕووداوه‌که‌ت به چاوی خۆت بینیبێت، سوور بوویت له‌سه‌ر ئه‌وه‌ی ئه‌و خۆی کوشتووه... هه‌میشه وات زانیوه یه‌کێک له‌و دووانه باپیره‌گه‌وره‌ی تۆیه، به‌ڵام له لایهک ئاسان نه‌بووه بزانیت کامیانه و له لایه‌کی دیکه نه‌کراوه له‌وه تێبگه‌یت ئاخۆ باپیره‌گه‌وره‌ته به لای دایکته‌وه یان به لای باوکته‌وه... چ خۆکوشتن و چ سه‌رهه‌ڵگرتن به درێژاییی مێژووی هه‌ردوو بنه‌ماڵه‌که شتێکی ئاسایی بووه... به‌شێکیان خۆیان کوشتووه و به‌شێکیشیان سه‌ریان هه‌ڵگرتووه و جارێکی دیکه که‌س نه‌یبینیونه‌ته‌وه... شتێکی دیکه هه‌یه، که ئه‌مه‌یان ڕه‌نگه له تۆ زیاتر به خه‌یاڵی که‌سی دیکه‌دا نه‌هاتبێت... ئه‌ویش ئه‌وه‌یه به دوورت نه‌زانیوه یه‌کێ له ئه‌ندازیار و شاگرده‌که‌ی ژن بووبێت، ئه‌وه ئه‌گه‌ر نه‌ڵێی باوه‌ڕت وایه هه‌ردووکیان ژن بوون... زۆربه‌ی کات ئه‌وانت له شێوه‌ی ژن هێناونه‌ته به‌رچاو، به‌ڵام ئه‌وه هیچی له‌وه نه‌گۆڕیوه، که تۆ خۆت به نه‌وه‌ی یه‌کێ له‌و دووانه بزانیت، جا ئه‌وه‌یان داپیره‌گه‌وره‌ت بێت یان باپیره‌گه‌وره‌ت... باشه له‌م کاته‌‌دا ئه‌مه‌ت بۆ بیر کهوتهوه...؟! (ئالان) به سه‌رسووڕمانه‌وه لێت ڕاده‌مێنێت و نازانێت بۆ تۆ له‌ناکاو ئه‌سپه‌که‌ت به نیوه‌چڵی جێ هێشتووه... ئه‌وه‌تا هه‌ر به‌و ده‌سته قوڕاوییانه‌ته‌وه له ده‌رگای حه‌وشه ئاودیو ده‌بیت و بۆ یه‌که‌مجار به‌ره‌و مناره‌ی چۆڵی به ڕێ ده‌که‌ویت.......
له ڕێگا له‌گه‌ڵ براده‌رێکدا یه‌کتر ده‌ناسنه‌وه، که هه‌ردووکتان له سه‌رده‌می هه‌رزه‌کاریدا ئه‌ندامی یه‌ک تیمی فوتباڵ بوونه... بیرت نه‌ماوه ده‌سته‌کانت قوڕاویین و تۆقه‌ی له‌گه‌ڵ ده‌که‌یت... ته‌ریق ده‌بیته‌وه، که‌چی ئه‌و هیچ ئه‌مه‌ی به لاوه سه‌یر نییه... ڕاستییه‌که‌ی تۆ ئه‌وت ناسیه‌وه، چونکه به یاریکه‌ر (Player)ێکی دیاری تیمه‌که‌تان داده‌ندرا، به‌ڵام تۆ ڕیزێرڤ (Reserve) بوویت و که‌م که‌س ده‌یناسیت... یه‌که‌مجار بوو ئه‌و وشه‌یه ببیستیت، که دواتر زانیت مانای ئه‌وه‌یه تۆ یاریکه‌رێکی سه‌ره‌کی نیت، بۆیه ته‌نیا له حاڵه‌تێکدا، که یه‌کێک له یاریکه‌ره سه‌ره‌کییه‌کانی تیمتان شوێنێکی بریندار ببێت و نه‌توانێت درێژه به گه‌یم (Gameیاری) بدات، یان ئه‌گه‌ر ڕۆژی (ماچ) یانزده یاریکه‌ری سه‌ره‌کی ئاماده نه‌بن، ئه‌وا تۆی ڕیزێرڤ چانسی ئه‌وه‌ت هه‌یه بێیته ناو ستادیۆم (Stadiumیاریگا) و یاری بکه‌یت... به ڕاست...!! مه‌به‌ست له وشه‌ی (ماچ)یش (Match)ی ئینگلیزییه، که مانای یاریی نێوان دوو تیم ده‌گه‌یه‌نێت، که‌چی لای تۆ واتایه‌کی دیکه‌ی ته‌واو جیاوازی ده‌به‌خشی و چێژت لێ ده‌بینی... ئه‌گه‌رچی تۆ تاکه ڕیزێرڤ نه‌بوویت، به‌ڵام ئه‌و ناوه ته‌نیا به سه‌ر تۆدا بڕا و هه‌ر ئاوا بانگ ده‌کرایت... سه‌ره‌تا واتده‌زانی له‌به‌ر ئه‌وه‌یه، که وشه‌که هه‌ندێک له ناوی خۆته‌وه نزیکه، یان با بڵێین له‌نێوان (ڕیزێرڤ) و (زێریڤان)دا زۆربه‌ی پیته‌کان هاوبه‌شن، به‌ڵام دواتر بۆت ده‌رکه‌وت مه‌سه‌له‌که شتێکی ته‌واو جیاوازه... ڕه‌نگه هه‌ندێک وا بزانن وشه‌ی (زێریڤان) له (زێڕ)ه‌وه هاتووه به‌تایبه‌تی باوکت بازرگانی زێڕ و ئه‌ڵماس بووه، به‌ڵام ئه‌و ناوه دوور و نزیک پێوه‌ندیی به زێڕه‌وه نییه، به‌ڵکو مانای که‌سێكی چالاک ده‌گه‌یه‌نێت، که به‌داخه‌وه ته‌واو پێچه‌وانه‌ی وشه‌ی (ڕیزێرڤ)ه... کاتێکیش ئه‌و ناوه‌یان لێ ناویت، باوکت فه‌رمانبه‌ر بووه... دوای ئه‌وه‌ی باپیرت خۆی کوشتووه و ئه‌و سامانێکی زۆری بۆ جێ ماوه، ئینجا به ته‌گبیری هاوڕێیه‌کی وازی له ئیشه‌که‌ی هێناوه و ده‌ستی داوه‌ته بازرگانیی زێڕ و ئه‌ڵماس... تیمه‌که‌تان له‌ناو سه‌رجه‌م تیمه‌کانی شاردا به‌وه ده‌ناسرایه‌وه، که زاراوه‌کانی یاریی فوتباڵی به ئینگلیزی به کار ده‌هێنا... هۆکاره‌که‌شی بۆ (کۆچ)ی ئێوه ده‌گه‌ڕایه‌وه... ئه‌و (کۆچ)ه‌تان ئه‌مه‌ی به‌سه‌ردا ده‌سه‌پاندن... ڕه‌نگه وا بزانن مه‌به‌ستت ئه‌وه‌یه ئێوه بۆ لایهک کۆچتان کردبوو... نا، نا، ئه‌وه نییه، به‌ڵکو (کۆچ Coach) واته ڕاهێنه‌ر... ناوی (دڵشاد ڕه‌مزی) بوو... که‌م که‌س ده‌یزانی پوورزای دایکته... ماوه‌یه‌کی ته‌مه‌نی خۆی له له‌نده‌ن به سه‌ر بردبوو... ناوماڵه‌که‌یشی له‌سه‌ر شێوازی ماڵێکی ئینگلیزی ڕێکخستبوو... به ته‌نیا ده‌ژیا، به‌ڵام ده‌یانوت له‌گه‌ڵ (ست ساماڵ)ی دایکی ئه‌و هاوڕێیه‌تدا پێوه‌ندییان هه‌یه، که ئه‌وه‌تا وا دوای ته‌مه‌نێکی زۆر له ڕێگای مناره‌ی چۆڵیدا بینیته‌وه... ئه‌و ژنه چ له کاتی تره‌ینینگ (Training مه‌شق) و چ له کاتی ماچه‌کاندا ده‌هاته ستادیۆم... ده‌یوت نایه‌وێت له تاقه‌کوڕه‌که‌ی داببڕێت، بۆیه له‌گه‌ڵی ده‌هات و ده‌گه‌ڕایه‌وه... به هۆی ئه‌وه‌ی تۆ ڕیزێرڤ بوویت، زۆربه‌ی کات پێکه‌وه له‌سه‌ر ئه‌و سه‌کۆیه داده‌نیشتن... ده‌تویست بزانیت ئاخۆ ئه‌و شتانه‌ی له باره‌یه‌وه ده‌یڵێن، تا چ ڕاده‌یه‌ک ڕاستن، بۆیه به دیقه‌ته‌وه سه‌رنجت له هه‌موو هه‌ڵسوکه‌وتێکی ده‌دا... ئه‌گه‌رچی به‌رده‌وام کراس و ته‌نووره‌یه‌کی ڕه‌شی ده‌پۆشی، به هۆی ئه‌وه‌ی مێرده‌که‌ی له سێداره درابوو، به‌ڵام زۆر بایه‌خی به ستایلی قژی، ماکیاژ و بۆیه‌ی نینۆکه‌کانی ده‌دا... ڕه‌نگه هه‌ندێک وایان زانیبێت ئه‌و ژنه بۆیه هێنده سه‌رنجڕاکێشه، چونکه تاقه مێیینه‌یه‌که، هیچ نه‌بێت له کاتی تره‌ینینگه‌کاندا، که له‌و ستادیۆمه، له‌ناو ئه‌و هه‌موو نێریینه‌یه‌‌دا ده‌بینرێت، به‌ڵام تۆ له‌و باوه‌ڕه‌دا بوویته، که هه‌ر به ڕاستی جوانیی ئه‌و ژنه بێوێنه‌یه... باڵایه‌کی به‌رز و ڕێکی هه‌بوو... له‌وه ده‌چوو ئه‌ویش به شێوه‌یه‌ک له شێوه‌کان خه‌ریکی سپۆرت بێت، چونکه زۆر گورجوگۆڵ ده‌هاته به‌رچاو... تۆنی ده‌نگیشی تا بڵێی سه‌رنجڕاکێش بوو... کاتێ ده‌دوا و گوێت له‌و وشانه‌ی ده‌گرت، واتده‌زانی که‌نارییه‌یه‌ک له‌ناو قوڕگیدایه... بۆنی عه‌تره‌کانی ته‌فره‌یان ده‌دایت، که دوایی بۆت ده‌رکه‌وت ئه‌و هه‌رگیز عه‌تر له خۆی نادات، به‌ڵکو ئه‌وه بۆنی ئاره‌قه‌ی بنباڵ و نێوان مه‌مکه‌کانیه‌تی... ملوانکه‌یه‌کی جوانی ده‌کرده ملیه‌وه... سه‌ره‌تا واتده‌زانی ناوی خۆیه‌تی له‌سه‌ر نقێمه سووره‌که‌یدا هه‌ڵکه‌ندراوه، که ده‌گه‌یشته نێوان هه‌ردوو مه‌مکی و له شێوه‌ی دڵ دروست کرا بوو، به‌ڵام دوایی ده‌رکه‌وت هیی کوڕه‌که‌یه‌تی، که ته‌نیا پیتی کۆتاییان جیاواز بوو... بۆیه زۆرجار (دڵشاد ڕه‌مزی) له جیاتی بڵێ (سامان)، ده‌یوت (ساماڵ)، به تایبه‌تی ئه‌و جارانه‌ی (سامان) شتێکی بکردایه، که لای ئه‌و په‌سه‌ند بووایه... ئه‌وسا پێی ده‌وت:
__________________
شاره که م , به ندی دلم , ئه ی باغی مه ن
ره وره وه ی ساوایه تیم , سابلاغی مه ن
دل به هیوات لیده دا , لانکی دلی
تو له وه رزی یادی مه ن دا , سه رچلی
خالید حسامی( هیدی )
|
|
جای تبلیغات شما اینجا خالیست با ما تماس بگیرید
|
|
05-28-2012
|
|
مدیر تاریخ و بخش فرهنگ و ادب کردی |
|
تاریخ عضویت: Aug 2009
محل سکونت: مهاباد
نوشته ها: 19,499
سپاسها: : 3,172
3,713 سپاس در 2,008 نوشته ایشان در یکماه اخیر
|
|
چیرۆک ( 2 )
کاروان عومه‌ر کاکه‌سوور
_ ئافه‌رین ساماڵ گیان... گوڵی منی ساماڵ.
خۆ له‌و کاتانه‌‌ی (سامان) گۆڵی ده‌کرد، (دڵشاد ڕه‌مزی) هه‌ڵده‌ستایه‌وه سه‌ر پێ و یه‌ک به ده‌نگی خۆی ده‌یوت:
_ قوربانت بم ساماڵ... دڵه‌که‌ی منیت ساماڵ گیان.
ئه‌مه‌ش زیاتر ئێوه‌ی ده‌خسته سه‌ر ئه‌و باوه‌ڕه‌ی، که پێوه‌ندییه‌کی نهێنی له‌نێوان ئه‌و دووانه‌دا هه‌یه... تۆ ئه‌وت به (ست ساماڵ) بانگ ده‌کرد، به‌وه‌ی به‌شی ئینگلیزیی له زانکۆی به‌غدا خوێندبوو و له یه‌کێ له دواناوه‌ندییه‌کانی کچاندا ده‌رسی ده‌وته‌وه... ئه‌ویش وه‌کو ئێوه زاراوه‌کانی به ئینگلیزی به کار ده‌هێنا، به‌ڵام زیاتر وه‌کو ئینگلیزێک ده‌نگی پیته‌کانی ده‌رده‌بڕی، که ئه‌مه به ده‌وری خۆی ئه‌وی سه‌رنجڕاکێشتر نیشان ده‌دا... هه‌روه‌ها زۆر به‌وه‌ش سه‌رسام بوو، که ئێوه نه‌ک هه‌ر زاراوه‌کانتان به ئینگلیزی به کار ده‌هێنا، به‌ڵکو به زمانی کوردییش کۆمه‌ڵێک ماناتان بۆ کرداره‌کان داتاشی بوو... بۆ نموونه ((ورگیم هه‌ڵدڕی))، واته به هێزێکی گه‌وره‌وه تۆپه‌که‌م له تۆڕه‌که دا... به‌مه‌یان تا بڵێی سه‌رسام بوو، به‌ڵام تۆی ڕیزێرڤ یه‌ک جاریش نه‌توتبوو: ((ورگیم هه‌ڵدڕی))، به‌ڵکو هه‌میشه ده‌توت: ((ورگی هه‌ڵدڕی))... (ست ساماڵ) زوو زوو به تۆی ده‌وت:
_ هیوادارم وه‌کو هاوڕێکانت پێش بکه‌ویت و له ماچه‌کاندا به‌شداری بکه‌یت... پڕ به دڵ حه‌ز ده‌که‌م ورگی هه‌ڵدڕی.
یان ده‌یوت:
_ حه‌ز ده‌که‌م له ماچێکی گه‌رمدا گۆڵی خۆت بکه‌یت و من هه‌لهه‌له‌ت بۆ بکێشم.
به‌و قسانه‌ی هه‌م ده‌یشکاندیت و هه‌م هه‌وه‌سی ده‌بزوواندیت... وشه‌ی (ماچ)ی به شێوه‌یه‌ک ده‌رده‌بڕی، که ده‌ترسایت یه‌کێ له‌و جارانه خۆتت بۆ دابین نه‌کرێت و په‌لاماری بده‌یت، چونکه له‌گه‌ڵ وتنه‌وه‌یدا ده‌نگی ماچێکی قووڵی ده‌رده‌کرد... به‌ڵێ، ده‌ترسایت له‌و ستادیۆمه، به به‌رچاوی ئه‌و هه‌موو سپێکتاته‌ر (Spectatorجه‌ماوه‌ر)ه‌وه ڕووتی بکه‌یته‌وه و تێر تێر ناو ده‌م و گۆی مه‌مکه‌کانی بمژیت... ئه‌گه‌رچی ئه‌وان وایان ده‌زانی تۆ له داخی ئه‌و نازناوه‌ت وازت هێنا، به‌ڵام راستییه‌که‌ی هۆکاری سه‌ره‌کیی ئه‌و ژنه بوو، که ده‌ترسایت تووشی گۆبه‌ندێکت بکات... ئاگات له هه‌واڵیشی نه‌ما، چونکه له‌وساوه ببڕای ببڕای دوو پێت نه‌خسته‌وه ناو ئه‌و ستادیۆمه... ته‌نانه‌ت سه‌ردانی ماڵی (دڵشاد ڕه‌مزی)ی پوورازی دایکیشتت نه‌ده‌کرد... له هه‌مووی سه‌یرتر ورده ورده له‌ناو خه‌ڵکدا (ڕیزێرڤ) شوێنی ناوه ڕاسته‌قینه‌که‌تی ده‌گرته‌وه، بگره باوکت هه‌تا مرد و دایکت هه‌تا ئه‌و ڕۆژه‌ی له‌پڕ دیار نه‌ما و که‌س نه‌یزانی بۆ کوێ سه‌ری هه‌ڵگرت، هه‌ر (ڕیزێرڤ)یان پێ ده‌وتیت... ئه‌گه‌رچی له فایله‌کانی قوتابخانه‌دا ناوه ڕاسته‌قینه‌که‌ت نووسرابوو، که‌چی مامۆستاکان هه‌ر به (ڕیزێرڤ) ده‌یانخوێنده‌وه... ئێستاش، که له ڕێگای مناره‌ی چۆڵیدا (سامان)ی کوڕی (ست ساماڵ)ت بینیوه‌ته‌وه، ناوه ڕاسته‌قینه‌که‌تی بیر نا‌که‌وێته‌وه، بۆیه زۆر ئاسایی هه‌ر به (ڕیزێرڤ) بانگت ده‌کات... نازانی بۆچی دیسان مه‌یلت بۆ زانینی هه‌واڵی دایکی په‌یدا کردووه‌ته‌‌وه، بگره ده‌ته‌وێت ڕێگایه‌ک بدۆزیته‌وه و پرسیاری ئه‌وی لێ بکه‌یت... ئه‌گه‌رچی له‌وساوه یه‌ک جاریش نه‌تدیوه، به‌ڵام زوو زوو خه‌ونی پێوه ده‌بینیت... هه‌ر ئه‌و خه‌ونانه پاڵیان پێوه ناویت به دوایدا بگه‌ڕێیت و به هه‌ر شێوه‌یه‌ک بێت بیدۆزیته‌وه، به‌ڵام خێرا ئه‌و هه‌سته‌ی خۆتت سه‌رکوت کردووه... له‌م دواییه بۆت ده‌رکه‌وت بۆیه ناته‌وێت به دوایدا بگه‌ڕێیت، چونکه ترسی ئه‌وه‌ت هه‌یه وێنه‌که‌ی تێکه‌ڵی ئه‌وه‌ی دایکت ببێت... ڕوونتر بڵێیت ده‌ترسی له‌ناکاو وا بزانیت له دایکت ده‌گه‌ڕێیت، که زۆر له‌پڕ دیار نه‌ما و که‌س نه‌یزانی بۆ کوێ سه‌ری هه‌ڵگرتووه... مه‌حاڵه له‌وه تێبگه‌یت، که بۆچی هێنده له‌وه ترساویت به دوای دایکتدا بگه‌ڕێیت... ئه‌وه‌ی ئه‌مڕۆت سه‌یره... حه‌ز ده‌که‌یت بزانیت ئێستا (ست ساماڵ) دوای ئه‌و هه‌موو ساڵه، که ته‌مه‌نی له شه‌ست تێپه‌ڕیوه، چی به سه‌ر هاتووه و شێوه‌ی له چاو ئه‌وسادا چه‌ند گۆڕاوه... له‌ناکاو (سامان) لێت ده‌پرسێت:
_ تۆ کێ له‌گه‌ڵ خۆت ده‌هێنیته‌وه؟
ده‌ڵێیت:
_ تێناگه‌م... مه‌به‌ستت چییه...؟!
به سه‌رسووڕمانه‌وه له سیمات ڕاده‌مێنێت:
_ تۆش ناچیته مناره‌ی چۆڵی...؟!
_ با، به‌ڵام مه‌به‌ستت چییه له‌وه‌ی ده‌ڵێی کێ له‌گه‌ڵ خۆت ده‌هێنیته‌وه...؟!
_ مه‌به‌ستم ئه‌وه‌یه کامه مردووی خۆت ده‌هێنیته‌وه...؟
هێنده‌ی دیکه سه‌رت سووڕ ده‌مێنێت و ده‌پرسیت:
_ مردوو...؟! مردووی چی...؟!
هه‌ندێک به تووڕه‌یی سه‌یرت ده‌کات، وه‌ک بیه‌وێت لێت بپرسێت: ((بۆچی ئاوا خۆت گه‌مژه نیشان ده‌ده‌یت...؟!))... ئینجا به تۆنێکی هه‌ندێک تووڕه‌وه وه‌ڵامت ده‌داته‌وه:
_ مردووی خۆت... ئه‌دی خه‌ڵک ئیشیان له مناره‌ی چۆڵی چییه...؟!
به‌سه‌ر گردۆلکه‌یه‌ک ده‌که‌ون و له‌وێوه ده‌ڕواننه ده‌وروبه‌ری مناره‌که... هه‌زاران که‌س ده‌بینن... گیانت ده‌له‌رزێت، به‌ڵام ناکرێت بگه‌ڕێیته‌وه، بۆیه ناچار له‌گه‌ڵ ئه‌ودا له گردۆلکه‌که دێیته خوارێ و له‌وێوه به‌ره‌و ئه‌وێ هه‌نگاو ده‌نێیت... ئه‌گه‌رچی هێشتا ته‌واو قسه‌کانی (سامان) نه‌چوونه‌ته ئه‌قڵته‌وه، به‌ڵام بیر له‌وه ده‌که‌یته‌وه ئاخۆ ئه‌و کام مردووه‌ی خۆی ده‌هێنێته‌وه... تۆ بڵێی (ست ساماڵ)ی دایکی......، .......؟! نازانی چی بڵێیت... له ڕێگا له‌ناو ئه‌و هه‌موو خه‌ڵکه‌دا پیاوێکی دیکه ده‌ناسیته‌وه، که له‌گه‌ڵ کوڕه‌که‌یدا قۆڵیان له قۆڵی یه‌کتر هه‌ڵکێشاوه و به‌ره‌و ئه‌وێ ده‌چن... ئه‌و پیاوه باڵابه‌رزه له سه‌ره‌تایی مامۆستای نیگارتان بوو... به هۆی ئه‌وه‌ی تۆ به‌هره‌ی سیرامیکت هه‌بوو، ئه‌و خۆشی ده‌ویستی... ساڵانه به‌شداریت له پیشانگای قوتابخانه‌کاندا ده‌کرد... یه‌کێ له‌و شتانه‌ی زۆر سه‌رنجی ئه‌وی ڕاکێشا، مناره‌ی چۆڵی بوو... ته‌نانه‌ت وای زانی تۆ لای مناره ڕاسته‌قینه‌که‌دا دروستت کردووه... کاتێ پێت وت له ژیانتدا له نزیکه‌وه مناره‌ی چۆڵیت نه‌دیوه، ئه‌و به شێوه‌یه‌کی زۆر سه‌یر لێت ڕاما، که پێشتر هه‌رگیز هیچ که‌سێک ئاوا به سه‌رسووڕمانه‌وه له‌و چاوانه‌تی نه‌ڕوانیبوو... واتده‌زانی ئێستا نا ساتێکی دیکه شتێکت له‌و باره‌یه‌وه پێ ده‌ڵێت، چونکه سیمای ئه‌وه‌ی ده‌گه‌یاند، به‌ڵام وه‌ک بڵێی زمانی شکابێت، هیچی بۆ نه‌ده‌وترا و به‌رده‌وام گرێی ملی ده‌جووڵایه‌وه، به ڕاده‌یه‌ک ده‌ترسایت بخنکێت... هیچ له‌و حاڵه‌ته تێنه‌ده‌گه‌یشتی، که ئه‌وسا له‌پڕ له‌ودا هه‌ستت پێ کرد......
__________________
شاره که م , به ندی دلم , ئه ی باغی مه ن
ره وره وه ی ساوایه تیم , سابلاغی مه ن
دل به هیوات لیده دا , لانکی دلی
تو له وه رزی یادی مه ن دا , سه رچلی
خالید حسامی( هیدی )
|
05-28-2012
|
|
مدیر تاریخ و بخش فرهنگ و ادب کردی |
|
تاریخ عضویت: Aug 2009
محل سکونت: مهاباد
نوشته ها: 19,499
سپاسها: : 3,172
3,713 سپاس در 2,008 نوشته ایشان در یکماه اخیر
|
|
چیرۆک ( 2 )
کاروان عومه‌ر کاکه‌سوور
ئه‌و تاکه مامۆستای سه‌ره‌تاییته، که هه‌تا ئێستا پێوه‌ندیت له‌گه‌ڵیدا مابێت... هه‌ر جارێ یه‌کترتان بینیبێت، پرسیاری ئه‌وه‌ی لێ کردوویت ئاخۆ له‌گه‌ڵ هونه‌ره‌که‌تدا به‌رده‌وامیت و به‌رهه‌می نوێت هه‌یه... له‌گه‌ڵ ئه‌وه‌شدا ئه‌و ترسه ته‌واو شپرزه‌ی کردوویت، به‌ڵام ناکرێت سه‌ڵاوی لێ نه‌که‌یت... یه‌که‌مجار له‌گه‌ڵ کوڕه‌که‌یدا به گه‌رمی تۆقه ده‌که‌ن، که‌چی کاتێ ده‌ستت بۆ ده‌ستی خۆی ده‌به‌یت و ده‌ڵێیت:
_ مامۆستا گیان چۆنی...؟!
ئه‌و ده‌ستی ناهێنێت، بگره هه‌ر سه‌یریشت ناکات... قۆڵی له قۆڵی کوڕه‌که‌یدا هه‌ڵکێشاوه و به‌ره‌و لای مناره ده‌چێت... ده‌ڵێی به ده‌م خه‌وه‌وه هه‌نگاو ده‌نێت... تۆ ته‌ریق ده‌بیته‌وه، به‌ڵام کوڕه‌که‌ی خێرا پێت ده‌ڵێت:
_ ماوه‌که‌ی ته‌واو بووه.
_ چی...؟!
_ ئه‌مڕۆ ماوه‌که‌ی ته‌واو بوو... ئه‌م ده‌به‌مه‌وه و به نیازم ئه‌مجاره دایکم بهێنمه‌وه... له‌وه‌ته‌ی مردوون، ئه‌وه یه‌که‌مجاره بیانهێنمه‌وه... ڕاستییه‌که‌ی کچه‌که‌م هه‌راسانی کردووم، هێنده‌ی بڵێ ده‌مه‌وێت دایه‌گه‌وره و بابه‌گه‌وره ببینم، ئه‌گینا من له‌م ده ساڵه‌ی دواییدا هیچ کاتێ تاقه‌تی هێنانه‌وه‌یانم نه‌بووه.
ئینجا ده‌پرسێت:
_ تۆ کێ ده‌هێنیته‌وه...؟!
ناتوانی وه‌ڵامی بده‌یته‌وه... باوه‌ڕیش به قسه‌کانی ناکه‌یت، چونکه چاک ده‌زانی تۆ له‌و ده ساڵه‌دا لانی که‌م بیست جارت له بازاڕ بینیوه... له‌گه‌ڵی وه‌ستاویت و باسی هونه‌ری سیرامیکتان کردووه... کاتێ ئه‌مانه به کوڕه‌که‌ی ده‌ڵێیت، ئه‌م قاقایه‌ک لێ ده‌دات و ئاوا وه‌ڵامت ده‌داته‌وه:
_ ئه‌وه سازانی خوشکم ده‌یهێنایه‌وه، که خۆیشی شه‌ش مانگ له‌مه‌وبه‌ر مرد.
که‌واته ئه‌و چه‌ند جاره‌ی یه‌کترتان ده‌بینی، ئه‌و مردبوو و له گۆڕستان گه‌ڕابووه‌وه... ئینجا بیرت کهوتهوه، که هه‌ندێک له پرسیاره‌کانی به ڕاستی سه‌یر بوون، به‌تایبه‌تی ئه‌وانه‌ی پێوه‌ندییان به هونه‌ری سیرامیکه‌وه هه‌بوو......
پێ به پێی ئه‌وان هه‌نگاو ده‌نێیت و تا دێت زیاتر ده‌ترسیت و سه‌راسیمه ده‌بیت... بیر له‌وه‌ش ده‌که‌یته‌وه، ئه‌و کوڕه‌ش وه‌کو (سامان) به لایه‌وه سه‌یر نییه، که تۆ به‌و ده‌سته قوڕاوییانه‌ته‌وه هاتوویته ده‌رێ... زۆر ئاسایی تۆقه‌ی له‌گه‌ڵدا کردیت......
(سامان) له‌ناکاو قۆڵ به قۆڵتدا ده‌کات و تۆ دڵت داده‌چڵه‌کێت... ئه‌وسا دووباره سه‌رنج له ده‌سته قوڕاوییه‌‌کانی خۆت ده‌ده‌یته‌وه... هێشتا به لاته‌وه سه‌یره، که ئه‌و هیچ گوێ به‌مه نادات... له‌وه‌ش سه‌یرتر، ئه‌و جاران هه‌میشه به چاوی نزم له تۆی ده‌ڕوانی و زۆر زۆر که‌م قسه‌ی له‌گه‌ڵدا ده‌کردیت... هه‌ر ئه‌مه وای لێ کردبوویت هێنده شه‌یدای ببیت و حه‌ز بکه‌یت بیکه‌یته هاوڕێیه‌کی نزیکی خۆت، به‌تایبه‌تی ئه‌م نه‌ک هه‌ر ناوی، بگره شێوه‌یشی به شێوه‌یه‌ک له شێوه‌کان له هیی دایکی ده‌چوو، به‌ڵام هه‌میشه له‌نێوان تۆی ڕیزێرڤ و ئه‌وی سکۆرێر (Scorer گۆڵکه‌ر)ی تیمدا به‌ربه‌ستێکی گه‌وره خۆی قوت ده‌کرده‌وه... که‌چی ئه‌وه‌تا ئێستا قۆڵی له قۆڵت هه‌ڵده‌کێشێت و به ڕووی خۆشه‌وه له‌گه‌ڵتدا ده‌دوێت... ئه‌گه‌رچی ڕووی خۆش و کات و شوێنێکی ئاوا لای تۆ مایه‌ی گه‌وره‌ترین سه‌رسووڕمانه... له‌وه ده‌چێت پاش ئه‌و گفتوگۆیه‌ی له‌گه‌ڵ کوڕی مامۆستادا داتمه‌زراند، باوه‌ڕی ته‌واوی هێنابێت، که تۆ درۆت له‌گه‌ڵدا نه‌کردووه، کاتێ وا خۆتت نیشان داوه دوای چل ساڵی ته‌مه‌ن هێشتا نازانیت خه‌ڵک ده‌توانن مردووی خۆیان بهێننه‌وه... یان ڕه‌نگه وای زانیبێت تۆ له ئه‌نجامی شۆکێکه‌وه ئه‌مه‌ت له بیر نه‌ماوه... به زمانێکی هێمن کۆمه‌ڵێک زانیارییت له‌و باره‌یه‌وه پێ ده‌گه‌یه‌نێت: ((مرۆڤ ده‌توانێت هه‌ر جارێ یه‌ک مردووی خۆی بۆ ماوه‌یه‌کی دیاریکراو بهێنێته‌وه، به مه‌رجێ ئه‌و مردووه به شێوه‌یه‌کی یاسایی گیانی له ده‌ست دابێت... ئه‌و مردووه‌ی هاتووه‌ته‌وه، ته‌نیا لای ئه‌و که‌سه ده‌خوات و ده‌خه‌وێت و خۆی ده‌شوات، که ئه‌رکی هێنانه‌وه‌که‌ی له ئه‌ستۆ گرتووه... ڕوونتر ئه‌گه‌ر کچێک باوکی بێنێته‌وه ماڵی خۆی، ئه‌وا خوشک و براکانی نایبینن، به‌ڵام ئه‌و مردووه ده‌توانێت سه‌ردانی خه‌ڵک بکات و بچێته شوێنه گشتییه‌کان، به مه‌رجێ ده‌م له نان و ئاویان نه‌دات.....، ........، ..........)).
(سامان) به‌رده‌وامه، به‌ڵام تۆ ورده ورده توانای گوێگرتنت نامێنێت... بیر له‌و مامۆستایه ده‌که‌یته‌وه، که هه‌ر جارێ له بازاڕ پێت بوتایه با شه‌ربه‌تێک بخۆینه‌وه، یان له پاقلاوه‌خانه‌یه‌ک دابنیشین و به‌ده‌م گفتوگۆ له‌باره‌ی هونه‌ری سیرامیکه‌وه پاقلاوه بخۆین، ئه‌و به شێوه‌یه‌کی زۆر سه‌یر ده‌یوت ناتوانێت، که‌چی هه‌رگیز جارێک پێی نه‌ده‌وتیت مردووه و بۆ ماوه‌یه‌کی دیاریکراو گه‌ڕاوه‌ته‌وه......
وا ورده ورده باوه‌ڕ به مه‌سه‌له‌که ده‌هێنیت، بگره ده‌گه‌یته ئه‌وه‌ی بڵێیت پێشتر هه‌موو ئه‌و شتانه‌ت زانیوه، به‌ڵام له‌به‌ر هه‌ر هۆیه‌ک بێت بیرت چوونه‌ته‌وه... به خۆت ده‌ڵێیت ڕه‌نگه که‌سانی دیکه‌ش هه‌بن وایان به سه‌ر هاتبێت... هه‌قی خۆشته وا بیر بکه‌یته‌وه... له‌وانه‌یه سبه‌ینێ ئه‌م به‌سه‌رهاته‌ت بکرێته چیرۆک، خوێنه‌ری وا هه‌بێت هه‌مان شتی تۆی به سه‌ر هاتبێت، که‌چی وا بزانێت ئه‌مه ئه‌فسانه‌یه‌کی پووچه، که مرۆڤ مردووی خۆی بهێنێته‌وه... ئه‌گه‌رچی ئه‌مه زۆر ده‌گمه‌ن ڕوو ده‌دات، مه‌گه‌ر ئه‌و خوێنه‌ره هه‌ر ته‌واو ئه‌قڵی خۆی له ده‌ست دابێت و ڕابردوو له مێشکیدا سڕابێته‌وه... ئینجا بیر له‌وه ده‌که‌یته‌وه، که کێ له‌گه‌ڵ خۆتدا بهێنیته‌وه... ئایا مرۆڤ ده‌توانێت وه‌کو مردووه‌کان ئه‌وانه‌ش بهێنێته‌وه، که سه‌ریان هه‌ڵگرتووه، یان به هه‌ر هۆیه‌ک بێت، دیار نه‌ماون...؟! ئه‌م پرسیاره بۆ دوایی هه‌ڵگره...!! خه‌یاڵت بۆ دایکت، باوکت، مامت و زۆر له هاوڕێیانی گه‌ڕه‌ک و قوتابخانه‌ش ده‌چێت... ڕاسته تا ئێستا ئه‌و ترسه ڕێگره له‌وه‌ی تۆ هیچ مردووێک له‌گه‌ڵ خۆتدا بێنیته‌وه، هه‌تا ئه‌گه‌ر ئه‌و مردووه دایکی خۆشت بێت، به‌ڵام دوور نییه له‌وێ ئه‌و ترسه‌ت بشکێت و بڕیارێکی ئاوا بده‌یت... هه‌ست ده‌که‌یت شته‌که یه‌کجار به‌و ئاسانییه‌ش نییه... بۆ نموونه تۆ ئه‌گه‌ر دایکت بێنیته‌وه، هه‌رچه‌ند لات ڕوون نییه دایکت مردبێت، به‌ڵام با بڵێین مردووه، یان وای دابنێ، که ده‌توانیت ئه‌ویش وه‌کو یه‌کێک له که‌سه سه‌رهه‌ڵگرتووه‌کانت بێنیته‌وه، ئه‌وه دڵنیایت شێت و هار ده‌بێت، که به ته‌نیا ئه‌وت هێناوه‌ته‌وه و باوکتت له‌وێ جێ هێشتووه، چونکه دوای ئه‌وه‌ی باوکت به سه‌رخۆشی له‌گه‌ڵ سۆزانییه‌کی ناسراودا له شه‌قڵاوه ده‌گه‌ڕایه‌وه و ئۆتۆمۆبیله‌که‌ی له لۆفه‌کانی مه‌سیفدا هه‌ڵدێرا... ئه‌نجام خۆی و سۆزانییه‌که پێکه‌وه گیانیان ده‌رچوو... دایکت هه‌میشه هیوای ده‌خواست ئه‌گه‌ر بۆ یه‌ک ڕۆژیش بێت باوکت زیندوو ببێته‌وه، بۆ ئه‌وه‌ی به چڕنووک پێستی له‌شی دابماڵێت و وه‌ک په‌یکه‌ره‌ئێسقانی ئاژه‌ڵی کێوی به‌ڕه‌لڵای کۆڵانی بکات... ئه‌مه ده‌قی قسه‌که‌ی خۆیه‌تی: ((ئاخ چۆن وه‌ک په‌یکه‌ره‌ئێسقانی ئاژه‌ڵی کێوی به‌ڕه‌لڵای کۆڵانم بکردایه...!!))... ئه‌و به حوکمی ئه‌وه‌ی له یه‌کێک له سه‌ره‌تاییه‌‌کاندا وانه‌ی زانستی ده‌وته‌وه، هه‌میشه شته‌کانی به باڵنده و ئاژه‌ڵ ده‌چوواند... هه‌تا ئه‌و ڕۆژه‌ی دیار نه‌ما و که‌س نه‌یزانی بۆ کوێ سه‌ری هه‌ڵگرتووه، داخی بۆ ئه‌وه هه‌ڵده‌کێشا، که باوکت ده‌ستبه‌جێ گیانی ده‌رچوو و ئه‌م فریا نه‌که‌وت به نینۆکه تیژه‌کانی ئه‌و پێسته‌ی وه‌کو کراسی نایلۆن له ئێسقانی داماڵێت... دایکی خۆته و چاکی ده‌ناسیت، که هه‌تا ئێواره پێی بڵێیت مرۆڤ بۆی هه‌یه ته‌نیا یه‌ک مردووی خۆی، یان ته‌نیا یه‌کێک له‌و که‌سانه‌ی سه‌ری خۆیان هه‌ڵگرتووه، بێنێته‌وه، ئه‌و گوێت لێ ناگرێت... به‌رده‌وام له‌گه‌ڵ باوکت شه‌ڕیان بوو... یه‌ک ڕۆژ نه‌تبینی ئه‌وانه پێکه‌وه ئاشت بن و دوو قسه‌ی خۆش به یه‌که‌وه بکه‌ن... نیوه‌ڕۆیه‌کی مانگی مه‌یه و دایکت جلێکی نوێی پۆشیوه... له‌سه‌ر کورسیی به‌رئاوێنه‌ی ژووره‌که‌ی دانیشتووه... قژی داده‌هێنێت و ماکیاژ ده‌کات... باوکت له دواوه ده‌ستی له ملی ده‌ئاڵێنێت و چه‌ند جارێ لێوی به پشتملی رووتیدا ده‌هێنێت... ئینجا سه‌ری ده‌خاته سه‌ر شانی و بۆنی بنباڵی هه‌ڵده‌مژێت... دایکت به بێ ئه‌وه‌ی ئاوڕ بداته‌وه، قۆڵ و باسکه ڕووته‌کانی له قاچه‌کانی ئه‌و ده‌ئاڵێنێت و دیمه‌نێکی زۆر سه‌رنجڕاکێش ده‌نوێنن... تۆ و (تابان)ی خوشکت له هه‌یوان چاوه‌ڕێیان ده‌که‌ن، هه‌تا ئه‌وانیش وه‌کو ئێوه خۆیان بڕازێننه‌وه و بچنه ئاهه‌نگی چه‌ند گۆرانیبێژێکی ناسراو له هۆڵی گه‌ل... ئه‌وه یه‌که‌مجارته ئه‌وان ئاوا به ته‌بایی ببینیت... له‌گه‌ڵ (تابان)دا له سیمای یه‌کتر ده‌ڕوانن و نازانن ئه‌مه‌تان پێ خۆشه یان ئازارتان ده‌دات... باوکت به هێمنی پێی ده‌ڵێت:
_ ئه‌رێ نابێت هه‌ر ئاوا به یه‌که‌وه ڕێک بین دڵارام...؟!
دایکت وه‌ک بڵێی مار پێوه‌ی دابێت، هه‌ڵده‌ستێته‌وه و شانه‌که‌ی ده‌ستی به ئاوێنه‌که‌دا ده‌کێشێت... له به‌رانبه‌ریدا ده‌وه‌ستێت و تا هێزی تێدایه ده‌ڵێت:
_ بۆ له من ده‌پرسی موفید...؟! له خۆت بپرسه... ئه‌وه هه‌ر تۆیت شه‌ڕ هه‌ڵده‌گیرسێنیت.
باوکت پاڵێکی قایمی پێوه ده‌نێت و پشتی به دیواردا ده‌دات... له ماوه‌یه‌کی که‌مدا چ سیمای خۆیان و چ سیمای ژووره‌که ته‌واو ده‌شێوێنن... خوێن به مه‌چه‌کی باوکت و به مل و سنگی دایکتدا ده‌چۆڕێته‌وه و یه‌ک که‌لوپه‌لی ئه‌و ژووره له شوێنی خۆیدا نامێنێت... نیوه‌شیان ده‌شکێن... هه‌میشه (تابان) لایه‌نی باوکت و تۆ لایه‌نی دایکتت ده‌گرت، بۆیه ئێوه‌ش له‌نێوان خۆتاندا ده‌تانکرده شه‌ڕ......
__________________
شاره که م , به ندی دلم , ئه ی باغی مه ن
ره وره وه ی ساوایه تیم , سابلاغی مه ن
دل به هیوات لیده دا , لانکی دلی
تو له وه رزی یادی مه ن دا , سه رچلی
خالید حسامی( هیدی )
|
05-28-2012
|
|
مدیر تاریخ و بخش فرهنگ و ادب کردی |
|
تاریخ عضویت: Aug 2009
محل سکونت: مهاباد
نوشته ها: 19,499
سپاسها: : 3,172
3,713 سپاس در 2,008 نوشته ایشان در یکماه اخیر
|
|
چیرۆک ( 3 )
کاروان عومه‌ر کاکه‌سوور
ئێستا شتێکی سه‌یر به خه‌یاڵتدا دێت... وای بۆ ده‌چیت (تابان) له ماوه‌ی ئه‌و چه‌ند ساڵه‌دا زیاتر له ده جار (موفید)ی باوکتی هێنابێته‌وه، چونکه له زۆربه‌ی گفتوگۆکانتاندا باسی هه‌ندێک شتی ئه‌و ده‌کات، که دوای مردنه‌که‌ی ڕوویان داوه... تۆ هه‌میشه ئه‌مه‌ت وا لێک داوه‌ته‌وه، که (تابان) ئه‌وی له ڕاده‌به‌ده‌ر خۆش ده‌ویست، بۆیه زۆر له تۆ زیاتر به مه‌رگی ئه‌و تێکچوو، ته‌نانه‌ت چه‌ند جارێک ویستی خۆی بکوژێت و ژنان نه‌یانهێشت... به‌رده‌وام به‌زه‌ییت پێدا هاتووه‌ته‌وه، که ناتوانێت باوکت له بیری خۆی بباته‌وه و به شێوه‌یه‌ک باسی ده‌کات، وه‌ک بڵێی هێشتا له ژیاندا مابێت... (ئالان)ی خوشکه‌زاشت زوو زوو بۆت ده‌گێڕێته‌وه، که چۆن (بابه موفید) بۆ بازاڕی بردووه و ئه‌سپ و تراکتۆر و لیگۆی بۆ کڕیوه... یان پێکه‌وه چوونه‌ته شاری یاری و پارکی ئاژه‌ڵان و له‌وێ کاتێکی خۆشیان به سه‌ر بردووه... پشتت به‌و زانیارییه که‌مه‌ی خۆت به‌ستووه، که له‌باره‌ی سایکۆلۆجیاوه هه‌ته و ئه‌مه‌ت وا ڕاڤه کردووه، که منداڵ له‌م قۆناغه‌ی ته‌مه‌نیدا ناتوانێت دنیای ڕاسته‌قینه و دنیای خه‌ون له یه‌کتر جیا بکاته‌وه، بۆیه زۆر شت هه‌ن ئه‌و له خه‌وندا ده‌یانبینێت، که‌چی وا ده‌زانێت به ڕاستی ڕوویان داوه... به‌ڵام ئێستا ده‌گه‌یته ئه‌و باوه‌ڕه‌ی، که ئه‌وه ته‌نیا تۆیت دنیای خه‌یاڵ و ڕاستیت لێ تێکه‌ڵ بووه، ته‌نانه‌ت بیرت نه‌ماوه خه‌ڵک ده‌توانن مردووی خۆیان بهێننه‌وه... ئاخر که‌س هه‌یه ئه‌مه‌ی بیر بچێته‌وه...؟! به ڕاستی ئه‌مه ته‌نیا له چیرۆک و میتۆلۆجیادا روو ده‌دات... باوه‌ڕ ناکه‌یت (تابان) یه‌ک جاریش (دڵارام)ی دایکتی هێنابێته‌وه... به‌ڵگه‌شت ئه‌وه‌یه نه خۆی و نه (ئالان)ی کوڕی هه‌رگیز باسی ئه‌و ناکه‌ن... به‌ڵام ئایا مرۆڤ وه‌ک چۆن ده‌توانێت مردووی خۆی بهێنێته‌وه، ئاواش ده‌توانێت هه‌ر له‌و شوێنه، له‌و مناره‌یه، ئه‌و که‌سانه‌ی بدۆزێته‌وه، که له‌به‌ر هه‌ر هۆیه‌ک بێت دیار نه‌ماون و که‌س نه‌یزانیوه بۆ کوێ سه‌ریان هه‌ڵگرتووه...؟!
به‌و ده‌سته قوڕاوییانه‌ته‌وه هه‌نگاو هه‌نگاو له‌گه‌ڵ (سامان)دا ڕێ ده‌که‌یت و له‌و خه‌ڵکه ده‌ڕوانیت، که هه‌ندێکیان لای مناره‌که دێنه‌وه و هه‌ندێکیان به‌ره‌و ئه‌وێ ده‌چن... خه‌ریکه مردوو و زیندوو له یه‌کتر جیا ده‌که‌یته‌وه... مه‌به‌ستم له‌و مرۆڤانه‌ن، که له شاره‌وه ده‌گه‌ڕێنه‌وه، چونکه مردووه‌کان به‌ده‌م ڕۆیشتنه‌وه ته‌نیا له مناره‌که ده‌ڕوانن و به هیچ شێوه‌یه‌ک سه‌ریان به‌ملا و به‌ولادا نابزوێنن، بۆیه ده‌توانی ئه‌وان له‌و که‌سانه جیا بکه‌یته‌وه، که ئه‌رکی هێنانه‌وه‌یانیان له ئه‌ستۆ گرتووه... ئه‌وانیش وه‌کو مامۆستا ده‌ڵێی به ده‌م خه‌وه‌وه هه‌نگاو ده‌نێن... سه‌رنجیشت داوه هه‌ر مردووێک و زیندووێک قۆڵیان له قۆڵی یه‌کتر هه‌ڵکێشاوه، به‌ڵام تۆ و (سامان) تاکه دوو که‌سی زیندوون وه‌کو ئه‌وانتان کردبێت... ئه‌مه هه‌ر خۆی له خۆیدا ترس و سه‌رسامییه‌که‌ت گه‌وره‌تر ده‌کات، به‌ڵام ناشتوانی قۆڵت له قۆڵی ئه‌ودا ده‌ربهێنیت... هه‌رچی ئه‌وانه‌ن، که له مناره‌که‌وه ده‌گه‌ڕێنه‌وه، ئاسان نییه بزانیت کامیان زیندووه و کامیان مردوو... ڕه‌نگه (سامان) سه‌ری له‌وه‌ش ده‌ربچێت، به‌ڵام تۆ پرسیاری له‌وه گرنگترت هه‌یه لێی بکه‌یت......
ورد ورد له سیمای ده‌ڕوانیت، وه‌ک بڵێی هه‌قی ئه‌و کاتانه بکه‌یته‌وه، که پڕ به دڵ حه‌زت ده‌کرد ئاوا له نزیکه‌وه سه‌رنج له‌و چاوه سه‌وز و لێوه پرته‌قاڵییانه‌ی بده‌یت و نه‌تده‌وێرا... له‌وه تێگه‌یشتوویت، که مرۆڤ کاتێ ده‌زانێت له‌نێوان زیندوو و مردوودا، یاخود له‌نێوان ژیان و مه‌رگدا جیاوازییه‌کان سڕاونه‌ته‌وه، شتێک نامێنێت به ناوی شه‌رم، به‌ڵکو ئه‌وه‌ی هه‌یه هه‌ر سه‌رسووڕمان و پرسیاره:
_ تۆ باوکت ده‌هێنیته‌وه...؟!
خۆشت نازانی چۆن ئه‌مه‌ت به سه‌ر زماندا هات... ئه‌و وه‌ک بڵێی قسه‌یه‌کی زۆر ترسناکی بیستبێت، خێرا به چوارده‌وری خۆیدا ده‌ڕوانێت و دوایی به چپه پێت ده‌ڵێت:
_ ناوی باوکم مه‌هێنه، چونکه خۆت ده‌زانی ئه‌و به شێوه‌یه‌کی یاسایی نه‌مردووه.
ئێستا زانیت مه‌به‌ست له (مردن به شێوه‌ی یاسایی و نایاسایی) چییه، چونکه ئه‌وسا، که ئاوای پێ وتی به چاکی لێی تێنه‌گه‌یشتیت... به‌ڵام بڵێ ئه‌گه‌ر تۆ سوور ده‌زانیت ڕێگای هاتنه‌وه‌ی باوکت نادرێت، ئه‌دی بۆچی ده‌چیت و کێ له‌گه‌ڵ خۆتدا ده‌هێنێته‌وه...؟!
_ من دایکم له‌گه‌ڵ خۆمدا ده‌هێنمه‌وه ڕیزێرڤ گیان.
_ دایکت...؟! ست ساماڵ...؟! بۆ ئه‌ویش مردووه...؟!
_ ئه‌دی تۆ ڕۆژی کوژرانه‌که‌یت بیر نییه...؟!
هه‌ر خێرا، پێش ئه‌وه‌ی تۆ وه‌ڵام بده‌یته‌وه، ئه‌و په‌نجه‌کانی به ناوچه‌وانیه‌وه ده‌گرێت و ده‌ڵێت:
_ ئۆهـ...!! نا...!! تۆ ئه‌وسا وازت له تیمه‌که‌مان هێنابوو...!!
_ تێم بگه‌یه‌نه سامان، دایکت که‌ی کوژرا و کێ کوشتی...؟!
_ ده‌زانی بیرم چووبوو، که تۆ ئه‌و ڕۆژه له ستادیۆم نه‌بوویت...؟!
_ له ستادیۆم کوژرا...؟!
_ به‌ڵێ، دوای ماچ (Match)ێکی گه‌رم.
_ بۆ کوژرا...؟!
_ چونکه ده‌رکه‌وت له‌گه‌ڵ هه‌موو ئه‌ندامانی تیم ڕایبواردووه، ته‌نانه‌ت له‌گه‌ڵ ڕیزێرڤه‌کانیش...؟! ئه‌مه‌ش بۆ ئه‌و..........، ........
_ چۆنت زانی...؟!
_ چی چۆنم زانی...؟! بۆ دایکی خۆم نییه...؟!
_ به‌ڵام ده‌یانوت ته‌نیا له‌گه‌ڵ کاک دڵشاد ڕه‌مزیی کۆچمان پێوه‌ندیی هه‌یه.
_ نه‌خێر، به به‌ڵگه‌وه ده‌رکه‌وت، که له‌گه‌ڵ هه‌موویاندا ڕایبواردبوو.
_ باوه‌ڕت بێت من به درێژاییی ئه‌و ماوه‌یه یه‌ک ماچیشم لێی نه‌کرد، ئه‌گه‌رچی زۆر حه‌زم لێی بوو... شێتی باڵای به‌رزی و قژی کاڵ و چاوه سه‌وزه‌کانی بووم، به‌ڵام له ڕووم نه‌ده‌هات.......، ........
_ ده‌زانم، پێویست ناکات پێم بڵێیت... له سه‌رنجه‌کانتدا ئه‌وه‌م ده‌خوێنده‌وه... دایکم خۆیشی زوو زوو پێی ده‌وتم ڕیزێرڤ زۆر حه‌زی لێمه، به‌ڵام شه‌رم ده‌کات... ده‌زانم چه‌ند جارێکیش دایکم کاتێ به مه‌به‌ستی ئینکورێگیمێنت (Encouragement هاندان)ی من هه‌ستاوه‌ته‌وه، تۆ ده‌ستت له‌سه‌ر شوێنه‌که‌ی داناوه و ئه‌و له‌سه‌ری دانیشتووه، به‌ڵام دوایی بۆی ده‌رکه‌وتووه ئه‌مه‌ت به ئه‌نقه‌ست نه‌کردووه و خێرا په‌نجه‌کانت له‌ژێر سمتی ده‌رهێناوه.
جا هه‌ر به ڕاستییش وابوو... ده‌ستت بێ هیچ مه‌به‌ستێک ده‌گه‌یشته ئه‌وێ، به‌ڵام کاتێ قنگی له‌سه‌ر داده‌نا، هه‌ستت به چێژێکی بێئه‌ندازه ده‌کرد، ئه‌گه‌رچی خێراش له‌ژێریت ده‌رده‌هێنا... هاوکات بیر له‌وه‌ش ده‌که‌یته‌وه، که تۆ جاران مه‌حاڵ بوو بوێریت گوته‌ی وا له دڵی خۆشتدا به که‌سێک بڵێیت، که‌چی ئه‌وه‌تا زۆر ڕاشکاوانه ئاڕاسته‌ی (سامان)ی ده‌که‌یت، ئه‌و (سامان)ه‌ی پێشتر له ڕووت نه‌ده‌هات له چاوه‌کانیشی بڕوانیت... ده‌گه‌یته ئه‌وه‌ی بڵێیت مرۆڤ ته‌نیا له‌به‌ر ئه‌وه شه‌رم ده‌کات، چونکه نه‌یزانیوه، یاخود زانیویه‌تی و بیری نه‌ماوه، که ده‌توانێت مردووی خۆی بهێنێته‌وه... هه‌موو ئه‌مانه بخه‌ره لاوه، به‌ڵام ده‌بێت کێ (ست ساماڵ)ی کوشتبێت...؟!
_ من کوشتم ڕیزێریڤ گیان.
_ تۆ...؟! چۆن...؟!
_ به چه‌قۆ... سکیم هه‌ڵدڕی.
_ چۆنت توانی...؟! ئێوه یه‌کترتان زۆر خۆش ده‌ویست... که‌م کوڕ و دایکی وه‌ک ئێوه‌م له ژیانمدا بینیوه، بۆیه ناتوانم باوه‌ڕ بکه‌م.
_ هه‌میشه ده‌مویست ئۆپه‌رچه‌نیتی (Opportunity ده‌رفه‌ت)ێکی باش بدۆزمه‌وه و به ئاسانی بیکوژم... ئه‌وه بوو دوای ئه‌و ماچه گه‌رمه ئێنزوزیازم (Enthusiasmحه‌ماس)ێکی سه‌یرم په‌یدا کرد، به ڕاده‌یه‌ک ده‌توت که‌سێکی دیکه‌م... نه‌مویست ئه‌و ئۆپه‌رچه‌نیتییه له ده‌ست خۆم بده‌م... خۆشبه‌ختانه‌ش له‌سه‌ر عه‌ره‌بانه‌ی شێلمفرۆشێکدا چه‌قۆیه‌کی تیژم ده‌ست که‌وت و ئه‌تاک (Attack هێرش(م بۆ برد... له به‌رچاوی ئه‌و هه‌موو سپێکتاته‌ره ورگیم هه‌ڵدڕی.
_ ئه‌دی دوایی چۆن په‌شیمان بوویته‌وه...؟!
_ کوا په‌شیمان بوومه‌ته‌وه...؟! وتم په‌شیمان بوومه‌ته‌وه...؟!
_ نا، وات نه‌وتووه، به‌ڵام ئه‌دی ئه‌وه نییه ده‌چیت بیهێنیته‌وه...؟!
قاقایه‌کی به‌رز لێ ده‌دات، به ڕاده‌یه‌ک قۆڵی له قۆڵت ده‌ترازێت و ڕووی ده‌که‌وێته دواوه... ئه‌م جووڵه‌یه‌ی هه‌مان ئه‌وه‌یانه، کاتێ له ستادیۆمه‌که لێیت ده‌بینی و پێی سه‌رسام ده‌بوویت... هه‌رکه تۆپه‌که له شێوه‌ی که‌وانێک، یان با بڵێین له شێوه‌ی په‌لکه‌زێڕینه‌یه‌که‌وه ده‌هات، ئه‌م به خێراییه‌کی سه‌رسووڕهێن ڕووی لێ وه‌رده‌گێڕا و به هه‌مان خێراییش بۆی ده‌گه‌ڕایه‌وه... که‌س نه‌یده‌زانی چۆن به سنگ ده‌یگرته‌وه و ده‌یخسته ژێر قاچیه‌وه... له‌وێوه ئه‌تاک (Attackهێرش(ی ڕاسته‌قینه ده‌ستی پێ ده‌کرد... دایکی له خۆشییان هه‌ڵده‌ستایه‌وه و هه‌لهه‌له‌ی ده‌کێشا... ده‌یوت:
__________________
شاره که م , به ندی دلم , ئه ی باغی مه ن
ره وره وه ی ساوایه تیم , سابلاغی مه ن
دل به هیوات لیده دا , لانکی دلی
تو له وه رزی یادی مه ن دا , سه رچلی
خالید حسامی( هیدی )
|
05-28-2012
|
|
مدیر تاریخ و بخش فرهنگ و ادب کردی |
|
تاریخ عضویت: Aug 2009
محل سکونت: مهاباد
نوشته ها: 19,499
سپاسها: : 3,172
3,713 سپاس در 2,008 نوشته ایشان در یکماه اخیر
|
|
چیرۆک ( 4 )
کاروان عومه‌ر کاکه‌سوور
_ بڕۆ... بڕۆ... ئه‌و ئۆپه‌رچه‌نیتییه له ده‌ست خۆت نه‌ده‌یت... لێی ده... ورگی هه‌ڵدڕه.
که‌واته خه‌تای ئه‌م هونه‌ره‌ی (سامان) و ئه‌و هه‌ڵسوکه‌وته‌ی دایکی بووه، که تۆ هه‌موو جارێک ده‌ستت دوور له خواستی خۆت گه‌یشتووه‌ته ئه‌وێ و ئه‌ویش له‌سه‌ری دانیشتووه... به‌ڵام واز له‌مه بێنه... ئه‌وه (سامان) بۆچی قاقا لێ ده‌دات...؟! ئایا هه‌قی خۆت نییه به لاته‌وه سه‌یر بێت، که ئه‌وێک دایکی خۆی بکوژێت و دواییش بچێت بیهێنێته‌وه...؟! پێشت بڵێ ئه‌مه مانای ئه‌وه نییه ئه‌و له کوشتنه‌که‌ی په‌شیمانه...؟!
_ نا، به هیچ شێوه‌یه‌ک په‌شیمان نیم.
_ ده‌توانی پێم بڵێیت بۆچی کوشتت و بۆچییش ده‌یهێنیته‌وه؟
_ کوشتم، چونکه ویستم ڕزگاری بکه‌م... ده‌زانم ئێستا ده‌پرسیت له چی ڕزگاری بکه‌م، بۆیه با له ئێستاوه وه‌ڵامت بده‌مه‌وه... من دایکمم له ژیان ڕزگار کرد... تۆ وا ده‌زانی ئه‌و زۆر ئاسووده ده‌ژییا و هیچ خه‌می نه‌ده‌خوارد، چونکه تۆ ته‌نیا له‌و ستادیۆمه ده‌تبینی و به چاوی نێریینه‌یه‌کیش لێیت ده‌ڕوانی، به‌ڵام ڕاستییه‌که‌ی ئه‌و ڕۆژانه به قه‌ده‌ر دنیا خه‌فه‌ت و ئازاری ده‌چه‌شت... هه‌ر له‌به‌ر ئه‌وه‌ش بوو ده‌هاته ئه‌وێ... وتم تۆ به چاوی نێریینه‌یه‌ک له‌وت ده‌ڕوانی، بۆیه وات ده‌زانی ئاسووده‌یه... ڕه‌نگه له مه‌به‌ستم تێنه‌گه‌یت... تۆ له‌ودا به دوای ئه‌و شتانه‌دا ده‌گه‌ڕایت، که چێژیان پێ ده‌به‌خشییت و ئه‌مانه‌شت به ئاسانی له ژنێکی جوان و ناسکی وه‌کو ئه‌ودا ده‌ست ده‌که‌وت، بۆیه وات ده‌زانی ئه‌م خۆیشی وه‌کو تۆ له خۆی ده‌ڕوانێت... واته تۆ له ڕێگای ئه‌و شتانه‌وه ئه‌وت ده‌هێنایه به‌رچاو، که خۆتیان ئاسووده ده‌کرد و وات ده‌زانی ئه‌و له‌ناو ئه‌و ئاسووده‌ییه‌‌دا نغرۆ بووه، به‌ڵام هه‌ر من ده‌زانم چ ئازارێکی گه‌وره به‌رده‌وام ئه‌وی ده‌تلانده‌وه.
_ ئه‌گه‌ر وایه چۆن ده‌یتوانی له‌گه‌ڵ تیمێک راببوێرێت...؟! ئایا چێژی له‌و رابواردنانه‌ی نه‌ده‌بینی...؟!
_ ڕه‌نگه سه‌ره‌تا هه‌ندێک چێژی بینیبێت، به‌ڵام دوایی کاتێ کار گه‌یشته ئه‌وه‌ی په‌نا بۆ ئۆراڵ کۆنتراسێپتیڤ Oral Contraceptive به‌رێت، تووشی خه‌مۆکی بوو، بۆیه به‌رده‌وام ئه‌نتیدیپرێسنت Antidepressantی به کار ده‌هێنا، که ئه‌مه دایکمی خسته بارێکی زۆر دژواره‌وه.
ئه‌وساش سێ چوار جار له‌و ستادیۆمه گوێت له‌و دوو زاراوه‌یه بووبوو، به‌ڵام وات ده‌زانی ئه‌مانه‌ش وه‌کو ئه‌وانی دیکه هه‌ر پێوه‌ندییان به سپۆرته‌وه هه‌یه و تۆیه‌کی ڕیزێرڤ لێیان تێناگه‌یت... ئێستا هه‌ر ئه‌وه‌نده له (سامان)ی ده‌پرسی، ئه‌و خێرا پێت ده‌ڵێت:
_ (ئۆراڵ کۆنتراسێپتیڤ) حه‌بی ڕێگرتنه له سکپڕبوون و (ئه‌نتیدیپرێسنت)یش حه‌بی دژی خه‌مۆکییه.
_ نازانم بڵێم چی، به‌ڵام ئه‌و کاته‌ی من ده‌مبینی، زۆر جوان و که‌شخه بوو... ده‌بێ دوایی ئه‌و شتانه‌ی تێدا ده‌رکه‌وتبێت.
_ وه‌کو پێم وتی تۆ له‌و شوێنانه‌ی ئه‌ودا ده‌گه‌ڕایت، که جوانی و ئاسووده‌ییان تێدا بوو، وه‌کو ماکیاژی ده‌موچاو و ستایلی قژی و جله‌کانی، به‌ڵام من ده‌متوانی ته‌نانه‌ت له‌و ستادیۆمه و له کاتی پێکه‌نین و هه‌لهه‌له‌کێشانیشیدا چینێکی ئه‌ستووری خه‌م و ناسۆر به سیمایه‌وه ببینم، که به ڕاستی ئه‌مه زۆر ئازاری ده‌دام.
_ باشه دایکت بۆ له‌گه‌ڵ ئه‌و هه‌موو کوڕه‌دا ده‌خه‌وت...؟! خۆ وه‌کو من بزانم ئێوه له ڕووی داراییهوه که‌موکوڕییتان نه‌بوو.
له‌گه‌ڵ ئه‌م قسه‌یه‌تدا سیمای ته‌واو ده‌گۆڕێت و به تۆنێکی تووڕه‌وه ده‌ڵێت:
_ دایکی من له هه‌موو ژیانیدا له‌پێناوی پاره‌دا له‌گه‌ڵ هیچ پیاوێک نه‌چووه‌ته ناو جێگاوه... له که‌سی قه‌بووڵ ناکه‌م تۆمه‌تی وای بداته پاڵ.
ئینجا که‌مێک هێمن ده‌بێته‌وه و ده‌ڵێت:
_ ده‌زانم تۆ باوه‌ڕ ناکه‌یت وای کردبێت و پرسیاره‌که‌شت به‌و مه‌به‌سته نه‌کردووه، به‌ڵام........
نایه‌وێت قسه‌که‌ی ته‌واو بکات و هه‌ناسه‌یه‌کی قووڵ هه‌ڵده‌کێشێت... تۆ پێی ده‌ڵێیت:
_ من تێناگه‌م ئه‌مڕۆ چیم به سه‌ر هاتووه سامان... ئه‌وه‌نده ده‌زانم هیچ شتێک ئاسایی نایه‌ته به‌رچاوم.
_ ئاگام لێته ڕیزێرڤ گیان، بۆیه ناهه‌قت ناگرم، ئه‌گه‌ر هه‌رچی بڵێیت... خۆ که‌سێکی دیکه ئه‌و قسه‌یه‌ی بکردایه، ...........، ........
_ به‌ڵام تۆ ئێستاش به منت نه‌وت بۆچی دایکتت کوشت.
_ پێم وتی، به‌ڵام وا دیاره تۆ تێنه‌گه‌یشتوویت.
ماوه‌یه‌ک هه‌ردووکتان بێده‌نگ ده‌بن و دوایی ئه‌م خۆی ده‌ڵێت:
_ من پێم وتی به‌و مه‌به‌سته کوشتم تا له ژیان ڕزگاری بکه‌م... ڕاستییه‌که‌ی ئه‌و خۆی زۆر هه‌وڵی خۆکوشتنی ده‌دا، به‌ڵام سه‌ری نه‌ده‌گرت... تۆ نازانی چ ئازارێکی گه‌وره‌یه، کاتێ مرۆڤ له کوشتنی خۆیدا سه‌رکه‌وتوو نابێت... وه‌کو ئه‌وه وایه میوانێک ده‌یان جنێوی سووک و ناشیرین به خانه‌خوێیه‌که‌ی ده‌دات و پێی ده‌ڵێت من له تۆ که‌مترم، ئه‌گه‌ر یه‌ک ڕۆژی دیکه‌ت لا بمێنمه‌وه، که‌چی هه‌ر ئه‌وسا بۆ لای ده‌گه‌ڕێته‌وه... ئه‌وه‌ی هه‌وڵی خۆکوشتن ده‌دات و سه‌رکه‌وتوو نابێت، هه‌میشه به شه‌رمه‌وه له ژیان ده‌ڕوانێت.
_ تۆ ئه‌مه چۆن ده‌زانیت...؟! ئایا هیچ جارێک هه‌وڵت داوه خۆت بکوژیت و سه‌ری نه‌گرتووه...؟!
_ به‌ڵێ، زیاتر له جارێکیش... ئه‌دی تۆ...؟!
_ من لاکه‌ی دیکه‌م کردووه... زۆرجار ده‌یان جنێوی سووکم به دایک و باوکم داوه و ماڵم جێ هێشتووه، به‌ڵام دوایی به ناچاری بۆ لایان گه‌ڕاومه‌ته‌وه.
_ که‌واته تۆ هه‌رگیز بیرت له خۆکوشتن نه‌کردووه‌ته‌وه... ئه‌وانه‌ی ده‌توانن وه‌کو تۆ له ئاستی دایک و باوکیاندا بوه‌ستنه‌وه، پێویستییان به خۆکوشتن نابێت.
ئه‌گه‌رچی چاک له مه‌به‌ستی تێناگه‌یت، به‌ڵام وات لێ ده‌کات بیر له‌وه بکه‌یته‌وه، که تۆ هه‌ر به ڕاستی له هه‌موو ژیانتدا بۆ یه‌ک جاریش نه‌تویستووه خۆت بکوژیت، له کاتێکدا چه‌ند که‌س له بنه‌ماڵه‌ی ئێوه چ به لای دایکت و چ به لای باوکته‌وه خۆیان کوشتووه... ته‌نانه‌ت هه‌ندێک وایان ده‌زانی مردنه‌که‌ی باوکیشت ئاسایی نه‌بووه، به‌ڵکو به ئۆتۆمۆبیله‌که‌یه‌وه خۆی له‌و لۆفانه‌دا هه‌ڵداوه‌ته خوارێ، به‌ڵام هاوڕێ نزیکه‌کانی ئه‌مانه‌یان به درۆ ده‌خسته‌وه... ده‌یانوت ئه‌گه‌ر به ته‌نیا بووایه، ڕێی تێ ده‌چوو، به‌ڵام ئه‌و سۆزانییه‌کی ناسراوی له‌گه‌ڵدا بووه... ئه‌ویش به‌وه ده‌ناسرایه‌وه، که سۆزانییه‌کانی له هه‌موو شتێک خۆشتر ده‌ویست، بۆیه شتێکی ئاوایان به مه‌حاڵ ده‌زانی... (تابان)ی خوشکیشت چ ڕۆژی مه‌رگی باوکت و چ پێشتر و دواتریش هه‌وڵی ئاوای داوه و سه‌ری نه‌گرتووه، ته‌نانه‌ت به‌رده‌وام پێشبینیی ئه‌وه ده‌که‌یت، که ئه‌و ڕۆژێک هه‌ر دێت به په‌ت خۆی بخنکێنێت، یان هه‌ندێک ژه‌هری پشیله بخوات... بۆیه ده‌ڵێیت ژه‌هری پشیله و هیی شتێکی دیکه نا، چونکه ئه‌و هه‌ر له خۆیه‌وه شه‌ڕێکی گه‌وره‌ی له‌گه‌ڵ پشیله‌دا هه‌ڵگیرساندووه... زۆرجاریش گوتوویه‌تی:
_ هه‌ر ڕۆژێکه و من له داخی پشیله خۆم ده‌کوژم.
سه‌ره‌تا واتده‌زانی بۆیه هێنده ڕقی له‌و گیانداره‌یه، چونکه ئه‌و شێت و شه‌یدای مشکه، به ڕاده‌یه‌ک ماڵه‌که‌ی پڕ کردووه له ڕه‌گه‌زه جیاوازه‌کانی مشک، به‌ڵام دوایی گه‌یشتیه ئه‌و باوه‌ڕه‌ی ئه‌مه‌شی ته‌نیا له ڕقی پشیله‌کانه، ئه‌گینا ئه‌و هه‌رگیز مشکیشی خۆش نه‌ویستووه... هه‌موو ئه‌و کونوکه‌له‌به‌رانه‌ی شار پێ ده‌زانێت، که ژه‌هریان لێ ده‌فرۆشرێت، به‌تایبه‌تی ژه‌هری پشیله... ڕۆژانه پشیله له کۆڵان و سه‌ربانی ماڵان و به‌ردووکانه‌کاندا ده‌مرن و لاشه‌یان بۆگه‌ن ده‌کات... دراوسێکان ئه‌گه‌رچی له هۆی مردنی ئه‌و هه‌موو پشیله‌یه تێناگه‌ن، به‌ڵام له‌گه‌ڵ ئه‌و بۆنه ڕاهاتوون... هه‌ر که‌سێک به سه‌ردان چووبێته ئه‌وێ، خێرا هه‌ستی پێ کردووه و لووتی خۆی توند توند گرتووه... ڕێستۆرانته‌که‌ی نزیک ماڵیان داخرا، چونکه له‌به‌ر بۆنی ئه‌و هه‌موو لاشه‌یه، که‌س بێزی نه‌ده‌هات له‌وێ نان بخوات... تۆ زۆر که‌م سه‌ردانی ده‌که‌یت... خۆ ئه‌وه‌نده‌ی له‌وێشیت ده‌م له نان و ئاو ناده‌یت... هه‌ندێجار به خۆت ده‌ڵێیت، که به هۆی دیمه‌نی مشک و بۆنی پشیله‌ی مردووه‌وه خوشکێک و خوشکه‌زایه‌کت له ده‌ست چووه... باشه ئه‌و چه‌ند جاره‌ی باوکتی هێناوه‌ته‌وه، ده‌بێت چی له‌و مشکانه کردبێت...؟! ئه‌و دوژمنی مشک و جرج بوو، به بێ ئه‌وه‌ی لایه‌نگری پشیله‌کانیش بێت... ڕاستییه‌که‌ی ئه‌و ڕقی له بۆنیان بوو، نه‌وه‌ک له خۆیان... به‌و لووته هه‌ستیاره‌ی ده‌یتوانی بۆنی هه‌موو گیاندار و بێگیانێک بکات، ته‌نانه‌ت له ده‌ستی ده‌هات بۆنی ئه‌و شتانه‌ش بکات، که مرۆڤ هه‌رگیز باوه‌ڕی نه‌کردووه بۆنیان هه‌بێت، به‌ڵام له هه‌موویان زیاتر به بۆنی پشیله و مشک تێکده‌چوو... ده‌سته‌کانی ده‌له‌رزین و چاوه‌کانی شله‌یه‌کی سه‌یریان پێدا ده‌هاته خوارێ... ده‌یوت ئه‌و دوو گیانداره ئه‌گه‌ر له هه‌موو شتێکدا له یه‌کتر جیاواز بن، ئه‌وا له بۆندا وه‌کو یه‌ک وان... به‌ڵێ، هه‌مان بۆن به بێ جیاوازی له هه‌ردووکیان دێت... زوو زوو ئه‌م قسه‌یه‌ی به گوێی ئێوه‌دا ده‌دا... له بیرته ئێواره‌یه‌کیان دایکت ماسیی له فڕندا سوور ده‌کره‌وه، که ئه‌مه خۆشترین خواردنی باوکت بوو، نه‌ک له‌به‌ر تامی، به‌ڵکو له‌به‌ر بۆنی، چونکه وه‌کو خۆی ده‌یوت بۆنی ماسی نه‌ک هه‌ر خۆشترین بۆنه، به‌ڵکو ده‌توانێت بۆنه ناخۆشه‌کانیش له‌ناو ببات... هه‌ر بۆیه به‌و بۆنه گه‌شبین ده‌بوو... له ده‌رگای حه‌وشه‌وه به ده‌م چڕینی گۆرانییه‌وه ده‌چووه ناندین، به‌و مه‌به‌سته‌ی سه‌رنج له دیمه‌نی ماسییه‌که بدات و له نزیکه‌وه بۆنه‌که‌ی هه‌ڵمژێت... له‌وێ شتێکی زۆر سه‌یر ڕووی دا، که چ تۆ و چ (تابان)ی خوشکیشت واقتان وڕما... سه‌ره‌تا هیچ له‌وه تێنه‌گه‌یشتن چۆن ئاوا له‌پڕ باوکتان له‌وپه‌ڕی هێمنی و دڵخۆشییه‌وه بۆ ئه‌وپه‌ڕی تووڕه‌یی و بێزارییه‌وه گۆڕا... به قژ دایکتانی بۆ ژووری نووستنه‌که‌یان ڕاکێشا، که ئێوه ژووری زۆرانبازییتان پێ ده‌وت... ئه‌وسا تۆ خۆت، ئینجا نازانی (تابان)یش، گوێت لێ بوو به دایکتی وت:
_ ڕه‌فعه‌تی حه‌سیب به‌گ...؟!
دایکت قیژاندی:
_ ڕه‌فعه‌تی حه‌سیب به‌گی چی...؟! تۆ خه‌ونت دیوه...؟!
_ بۆنی ئه‌و له گیانت دێت.
دوایی دایکت پێی وت، که ژنه‌که‌ی (ڕه‌فعه‌ت) حه‌فته‌ی پێشوو کاتێ بۆ ئاهه‌نگێک چووه، ئه‌م جلانه‌ی ئه‌وی قه‌رز کردووه... له‌مه‌وه باوکت هه‌ندێک هێمن بووه‌وه و وتی:
_ مه‌حاڵه لووتی من به هه‌ڵه‌دا بچێت.
له هه‌مووی سه‌یرتر باوکت زۆرجار به (ڕه‌فعه‌ت پشیله) ناوی ئه‌و پیاوه‌ی ده‌هێنا... تۆ هه‌رگیز له‌وه تێنه‌ده‌گه‌یشتیت، چونکه نه بیچمی له پشیله ده‌چوو و نه هیچ شتێک ئه‌وه‌ی ده‌رده‌خست، که ئه‌و پیاوه به شێوه‌یه‌ک له شێوه‌کان پێوه‌ندیی به‌و گیانداره چڕنووکتیژه‌وه هه‌بێت... هه‌رچۆنێ بێت (تابان) له دوای مردنی باوکته‌وه خووی دایه به‌خێوکردنی مشک و دژایه‌تیی پشیله‌وه... ڕه‌نگه ئه‌و مردووانه‌ی ده‌گه‌ڕێنه‌وه، هه‌سته‌کانیان گۆڕابێت، ئه‌گینا باوکت چۆن توانیوویه‌تی له ماڵی (تابان)دا هه‌ڵبکات...؟! ده‌کرێت بڵێیت (سامان) باسی ئه‌وه‌ی بۆ کردیت، به‌ڵام تۆ ئه‌وسا به‌رگه‌ی بیستنی ئه‌و شتانه‌ت نه‌ده‌گرت، بۆیه نه‌تده‌توانی گوێی لێ بگریت... به‌هه‌رحاڵ هه‌تا دێت زیاتر باوه‌ڕ به هێنانه‌وه‌ی مردوو ده‌هێنیت... یاخود به مانایه‌کی ڕاستتر بۆ دۆخی جارانی خۆت ده‌گه‌ڕێیته‌وه، ئه‌و دۆخه‌ی تێیدا زانیوته مرۆڤ وه‌ک چۆن نان ده‌خوات، ئاو ده‌خواته‌وه، پێده‌که‌نێت و فرمێسک ده‌ڕێژێت، ئاوایش ده‌توانێت بۆ ماوه‌یه‌کی دیاریکراو مردووی خۆی بێنێته‌وه، به مه‌رجێ ئه‌و که‌سه وه‌کو باوکی (سامان) به شێوه‌یه‌کی نایاسایی گیانی له ده‌ست نه‌دابێت... ئه‌وه‌تا (سامان) خۆیشی له خه‌یاڵێکی قووڵدا ڕۆ چووه... بێگومان ئه‌ویش بیر له هێنانه‌وه‌ی دایکی ده‌کاته‌وه... تۆ له‌و زیاتر بۆ بینینی به په‌رۆشیت... ئاخۆ شێوه‌ی له‌چاو ئه‌وسادا چه‌ند گۆڕا بێت...؟! ئایا ڕووه خۆشه‌که‌ی و تۆنه دڵگیره‌که‌ی ده‌نگی وه‌کو خۆیان ماون...؟! ئه‌رێ هه‌مان جلی جارانی پۆشیوه...؟! باشه تۆ ده‌ناسێته‌وه...؟! هه‌موو ئه‌مانه بخه‌ره لاوه، به‌ڵام ئایا سه‌یر نییه کوڕێک دایکی خۆی ده‌کوژێت و ده‌چێت ده‌شیهێنێته‌وه...؟! ئه‌مه‌ش به‌هه‌رحاڵ، که‌چی ده‌ڵێت به هیچ شێوه‌یه‌ک له کوشتنی په‌شیمان نییه... ئه‌مه ئه‌و نهێنییه‌یه، که تا ئێستا له تۆی نه‌گه‌یاندووه، یاخود تۆ نه‌تتوانیوه لێی تێبگه‌یت... من ده‌زانم ئه‌وه‌ی سه‌ری له تۆ شێواندووه، ئه‌وه‌یه، که ئه‌م له لایهک ده‌ڵێ بۆیه دایکی کوشتووه، چونکه به به‌ڵگه‌وه بۆی ده‌رکه‌وتووه له‌گه‌ڵ سه‌رجه‌م ئه‌ندامانی تیمدا ڕایبواردووه، که‌چی له لایه‌کی دیکه به لایه‌وه ئاساییه ڕایبواردبێت، به‌ڵکو ته‌نیا به‌وه تێکچووه، که ئه‌م په‌نای بۆ ئۆراڵ کۆنتراسێپتیڤ OralContraceptive بردووه و ئه‌نجام تووشی خه‌مۆکی بووه، بۆیه به‌رده‌وام ئه‌نتیدیپرێسنت Antidepressant ی به کار هێناوه... بێگومان تۆ له ده‌رفه‌تێکدا هه‌موو ئه‌مانه‌شی لێ ده‌پرسیت، به‌ڵام له‌وساوه سیمای کچ و کوڕێک ده‌که‌ونه به‌ر دیده‌ت و هه‌ر زوو له‌ناو ئه‌و حه‌شاماته‌شدا لێت ون ده‌بن... ئه‌مه ته‌واو سه‌رنجت ڕاده‌کێشێت... ئێستا ئه‌گه‌ر هه‌ندێک واز له (سامان) بێنیت و به دوای ئه‌واندا بگه‌ڕێیت، ئه‌وه دوور نییه بیاندۆزیته‌وه... لێره، له نزیک ئه‌و مناره‌یه شته‌کان له‌سه‌ر شێوازی خه‌ون ده‌جووڵێن... زوو ون ده‌بن و خێراش ده‌رده‌که‌ونه‌وه، به‌ڵام به شێوه‌ی جیاواز... به لای چه‌پدا ئاوڕ بده‌ره‌وه و بڕوانه لای گومبه‌زه‌که... به‌ڵێ، ئه‌وه‌تا خۆیانن... نا، به هه‌ڵه‌دا نه‌چووبوویت... (ڤیان) و (دلاوه‌ر)ن و قۆڵیان له قۆڵی یه‌کتر هه‌ڵکێشاوه... وا له‌وێوه به‌ره‌و مناره هه‌نگاو ده‌نێن... ترسی ئه‌وه‌ت هه‌یه (سامان)ت لێ ون ببێت، ئه‌گینا هه‌ر ئێستا دوایان ده‌که‌ویت و پێیان ده‌گه‌یته‌وه... ئاخر له پاش ئه‌و ڕووداوه‌وه هه‌رگیز جورئه‌تت نه‌کردووه له خه‌یاڵی خۆشتدا لێیان نزیک بکه‌ویته‌وه، به‌ڵکو له‌وێش هه‌ر خۆیان لێ ده‌شاریته‌وه... زۆر پرسیاری دیکه‌ت ماون له (سامان)یان بکه‌یت و ده‌شته‌وێت (ست ساماڵ)ی دایکی ببینیت، کاتێ ده‌یهێنێته‌وه، ئه‌گینا پێت باشه بچیته لایان... (سامان) له‌وساوه وه‌ک په‌یکه‌ر له شوێنی خۆی وه‌ستاوه و جووڵه ناکات... وای بۆ ده‌چیت دوای ئه‌وه‌ی پێت وت بۆچی دایکی له‌گه‌ڵ ئه‌و کوڕانه‌دا ڕایبواردووه، خۆ ئه‌وان له ڕووی داراییهوه که‌موکوڕییان نه‌بوو؛ ئه‌م زۆر تێکچووه... تۆ تازه جێی ناهێڵیت، به‌ڵام هیوا ده‌خوازیت له‌وێ (ڤیان) و (دلاوه‌ر)یش بدۆزیته‌وه، ئه‌گه‌رچی سوور ده‌زانیت (ڤیان) ناتوانێت قسه‌ت له‌گه‌ڵدا بکات، چونکه ماوه‌که‌ی ته‌واو بووه، به‌ڵام هه‌رچۆنێک بێت (دلاوه‌ر) ئاشت ده‌که‌یته‌وه و زۆر شتی تێده‌گه‌یه‌نیت، که پێشتر نه‌یزانیون... خۆ ئه‌گه‌ر ڕاستیت ده‌وێت له (ڤیان) ناگیرێت، که نه‌یه‌وێت قسه‌ت له‌گه‌ڵدا بکات... پێت خۆش بێت یان نا، به هۆی تۆوه خوێنی ڕژا... به‌ڵێ، کوشتنه‌که‌ی ده‌که‌وێته ئه‌ستۆی تۆوه... بۆچی ئاوا سه‌یر لێم ده‌ڕوانیت...؟! ده‌ستمان پێ کرده‌وه...؟! دیسان ده‌ته‌وێت نکووڵیی لێ بکه‌یت و له‌سه‌ر خۆتی لابه‌ریت...؟! به‌ڵام ئێستا له هه‌ر کاتێکی دیکه جیاوازه... ناتوانیت گوێم لێ نه‌گریت... وا من له نووکه‌وه ئه‌و چیرۆکه‌ت بیر ده‌خه‌مه‌وه، که پێشتر هه‌رچه‌ند هه‌وڵم دابێت بیرتی بخه‌مه‌وه، لێم تووڕه بوویت و نه‌تویستووه بیبیستیت، به‌ڵام ئیتر ناتوانیت له‌ژێر ده‌ستم ده‌رباز ببیت... من بۆت ده‌گێڕمه‌وه و تۆش ویژدانی خۆت بکه به دادوه‌ر... ئه‌وسا بزانه کێ به بکوژی ئه‌و کچه داده‌ندرێت... یه‌که‌مجار که له‌گه‌ڵ باوکه باخه‌وانه‌که‌ی هاته ماڵتان، ته‌مه‌نی حه‌وت هه‌شت ساڵ بوو... وا باشتره بڵێم هاته ناو باخه‌که‌تان، چونکه ئه‌و هه‌رگیز ناو چیمه‌ن و دره‌خته‌کانی جێ نه‌ده‌هێشت و قاچی نه‌ده‌خسته هه‌یوان... له‌وێش ته‌نیا یاریی له‌گه‌ڵ زینده‌وه‌ره‌کاندا ده‌کرد، وه‌ک بڵێی له‌و ڕێگایه‌وه ویستبێتی پێتان بڵێت له‌م ماڵه گه‌وره‌یه‌تان هه‌ر ئه‌و زینده‌وه‌ره ورد وردانه گیانیان له‌به‌ره و هه‌ر ئه‌مانه‌شم به لاوه گرنگن، که خۆتان نه ده‌یانبینن و نه ده‌یانناسن... هێلکه‌شه‌یتانۆکه‌کانی کۆ ده‌کرده‌وه... چمکی عه‌زییه‌که‌ی هه‌ڵده‌بڕی... دانه دانه ده‌یخستنه ناو ئه‌و چاڵه‌ی له عه‌زییه‌که‌یدا دروستی کردبوو... ئه‌وسا له‌گه‌ڵ به‌رزبوونه‌وه‌ی عه‌زییه‌که‌یدا هه‌تا نزیک ناوکی ده‌رده‌که‌وت... دایکی له ماڵه‌وه قژی بۆ داده‌هێنا و له دواوه وه‌ک کلکی ئه‌سپ به قردێله‌یه‌کی سوور بۆی ده‌به‌ست، به‌ڵام نه مایۆ و نه بیجامه‌ی له‌به‌ر ده‌کرد، چونکه نه‌یده‌زانی ئه‌م له‌وێ خه‌ریکی هێلکه‌شه‌یتانۆکه‌کان ده‌بێت و ئاوا گیانی ده‌رده‌که‌وێت... سه‌رنجت له شه‌نتووزی ده‌دا، که به شێوه‌یه‌ک له شێوه‌کان له هێلکه‌شه‌یتانۆکه ده‌چوو... ئه‌و دیمه‌نه بۆ کوڕێکی حه‌وت هه‌شت ساڵانی وه‌ک تۆ سه‌رنجڕاکێش بوو... (ڤیان) له شوێنێکدا هه‌موویانی ڕۆ ده‌کرد... دوای که‌مێک کرمی نه‌رم و لینج ((سه‌ره‌تا به چاو ده‌تزانی وه‌هان، ئه‌گینا بێزت نه‌ده‌هات ده‌ستیان لێ بده‌یت))، له‌و قاوغه سپییانه ده‌هاتنه ده‌رێ... ڕه‌نگیان له پێستی شه‌بزووزت ده‌چوو و به شێوه‌یه‌کی سه‌یر له‌سه‌ر ئه‌و زه‌وییه ده‌خشین... ئه‌و دوو شاخه‌ی سه‌ریان له‌گه‌ڵ خشیندا ده‌له‌رینه‌وه... نه‌تده‌زانی بۆچی هه‌وه‌ست ده‌بزووا... هه‌ر ئه‌مه‌ش وای لێ ده‌کردی بیانگریت و بیانخه‌یته سه‌ر له‌پته‌وه، به‌ڵام ئه‌وان ده‌ترسان و ده‌چوونه‌وه ناو قاوغه‌کانیان... باوکی له‌ناو دره‌خته‌کان خه‌ریکی ئیش بوو و (دلاوه‌ر)ی کوڕیشی به‌رده‌ستیی ده‌کرد... هێلکه‌شه‌یتانۆکه‌کان ختووکه‌ی ناوله‌پیان ده‌دایت... له‌گه‌ڵ ئه‌وه‌شدا (ڤیان) دوای ڕۆکردنیان، عه‌زییه‌که‌ی داده‌دا‌یه‌‌وه، به‌ڵام هێشتا دیمه‌نی ڕانه ڕووته‌کانی و شه‌نتووزی له به‌رچاوت ون نه‌ده‌بوون... سه‌ری ده‌هێنایه پێشه‌وه، به‌و مه‌به‌سته‌ی سه‌رنج له‌و کرمه نه‌رم و لینجانه بدات، کاتێ له‌ناو ئه‌و قاوغه سپییه‌دا دێنه ده‌رێ، به‌ڵام ئه‌وان هه‌رگیز سه‌ریان ده‌رنه‌ده‌هێنا... پێی ده‌وتی:
__________________
شاره که م , به ندی دلم , ئه ی باغی مه ن
ره وره وه ی ساوایه تیم , سابلاغی مه ن
دل به هیوات لیده دا , لانکی دلی
تو له وه رزی یادی مه ن دا , سه رچلی
خالید حسامی( هیدی )
|
05-28-2012
|
|
مدیر تاریخ و بخش فرهنگ و ادب کردی |
|
تاریخ عضویت: Aug 2009
محل سکونت: مهاباد
نوشته ها: 19,499
سپاسها: : 3,172
3,713 سپاس در 2,008 نوشته ایشان در یکماه اخیر
|
|
چیرۆک ( 5 )
کاروان عومه‌ر کاکه‌سوور
_ نا، نایه‌نه ده‌رێ... ده‌ترسن... خۆ ئه‌وان ده‌زانن ئێستا ماڵیان له‌سه‌ر ده‌ستی تۆیه.
قژی خاوی به‌ر ده‌موچاوت ده‌که‌وت و زیاتر ختووکه‌ت ده‌هات... دیسان له باوک و براکه‌یت ده‌ڕوانی، که هێشتا هه‌ر خه‌ریکی ئیشی باخه‌که بوون... (ڤیان) به په‌نجه باریکه‌کانی هێلکه‌شه‌یتانۆکه‌کانی له‌سه‌ر ده‌ستی تۆ هه‌ڵده‌گرت... ئه‌مه زیاتر ختووکه‌ی ده‌دایت... ده‌یبردنه په‌نادیواری ژووری زه‌خیره‌وه، که ده‌که‌وته لای خوارووی باخه‌که، گوایه له‌وێ ده‌یانداته به‌رهه‌تاو و ئه‌وانیش له‌گه‌ڵ گه‌رمبوونه‌وه‌دا دێنه ده‌رێ... تۆ ئه‌مه له‌و فێر بوویت... ئه‌و زۆر شتی له‌باره‌ی ژیانی ئه‌و زینده‌وه‌ره وردانه‌وه ده‌زانی، که تۆ ئه‌گه‌ر ئه‌و نه‌بووایه هه‌ر نه‌شتده‌بینین و نه‌تده‌زانی ئه‌وانه له باخه‌که‌تاندان... له‌وێ کرمه نه‌رم و لینجه‌کان له‌و قاوغه سپییانه ده‌هاتنه ده‌رێ و به‌و ناوه‌دا بڵاو ده‌بوونه‌وه، به‌ڵام ئه‌و هه‌مدیس چمکی کراسه‌که‌ی هه‌ڵده‌بڕی... دانه دانه ده‌یخستنه ناو ئه‌و چاڵه‌ی دروستی کردبوو... جارێکی دیکه هه‌تا نزیک ناوکی ده‌رده‌که‌وته‌وه... هێزێکی په‌نهان له‌ناوه‌وه پاڵی پێوه ده‌نایت، که تۆش بیجامه‌که‌ت دابکه‌نیت... خه‌تاکه‌یشیت ده‌خسته ئه‌ستۆی هێلکه‌شه‌یتانۆکه‌کانه‌وه... کاتێکت ده‌زانی وا له‌و په‌نادیواره له‌سه‌ری پاڵ که‌وتوویت... ئه‌گه‌رچی هه‌تا گه‌وره‌تر ده‌بوو، باوکی که‌متر له‌گه‌ڵ خۆیدا ده‌یهێنا، به‌ڵام تا هه‌ردووکتان گه‌یشتنه پۆلی شه‌شه‌می سه‌ره‌تاییش ئه‌و یارییه به‌رده‌وام بوو... جارێکیان له‌گه‌ڵ قیژه‌ی دایکت به ئاگا هاتن... هه‌ر ده‌توت خه‌ون ده‌بینن... کاتێکتان زانی وا باوک و برای ئه‌و و دایک و باوکی تۆ به سه‌ر سه‌رتانه‌وه وه‌ستاون... ئه‌وان به بێده‌نگی کچی خۆیان برده‌وه و تۆیان بۆ دایک و باوکت جێ هێشت... ئه‌گه‌رچی له‌و باره‌یه‌وه نه قسه‌یان له‌گه‌ڵدا کردیت و نه زلله‌یه‌کیان پێدا کێشایت، به‌ڵام ده‌تزانی له‌نێوان دایک و باوکتدا شه‌ڕێکی گه‌وره هه‌ڵگیرساوه... ئه‌وان ده‌رگای ژووری نووستنیان داخستبوو و به‌رده‌وام ده‌نگیان له‌سه‌ر یه‌کتر به‌رز ده‌کرده‌وه، به بێ ئه‌وه‌ی تۆ شتێکی ئه‌وتۆیان لێ تێبگه‌یت... ده‌تویست بزانیت (ڤیان)یش چیی به سه‌ر هاتووه... ئاسان نه‌بوو جارێکی دیکه بیبینیته‌وه... هه‌ر خێرا باخه‌وانێکی دیکه جێگای باوکی گرته‌وه... به دزییه‌وه ده‌چوویته لای ماڵیان، به‌و مه‌به‌سته‌ی بیبینیت، ئه‌گه‌رچی له ڕووت نه‌ده‌هات ئیتر له‌و چاوه سه‌وزانه‌ی ڕابمێنیت... خانووه‌که‌یان بچووک بوو، به‌ڵام زۆر سه‌یر ده‌هاته به‌رچاو... تاک و ته‌نیا له‌و ده‌شته ده‌یڕوانیه ئاوه‌دانییه‌وه... ده‌توت به خشتی پلاستیک له‌و به‌رزاییه‌دا دروست کراوه... ده‌بووایه سێ چوار پایه‌ی قادرمه ببڕیت، ئینجا بگه‌یته ده‌رگای حه‌وشه‌یان، به‌ڵام تۆ هه‌رگیز نه‌تده‌وێرا پێ بخه‌یته سه‌ر ئه‌و پایانه‌وه... هه‌رچه‌ند له دووره‌وه لێت ده‌ڕوانی، وه‌کو هێلکه‌شه‌یتانۆکه ده‌هاته به‌رچاوت، بۆیه گوته‌که‌ی (ڤیان) له گوێچکه‌تدا ده‌زرینگایه‌وه: ((نا، نایه‌نه ده‌رێ... ده‌ترسن... خۆ ئه‌وان ده‌زانن ئێستا ماڵیان له‌سه‌ر ده‌ستی تۆیه))... ئینجا هه‌ر به ڕاستی خانووه‌که‌یان ده‌توت له‌سه‌ر ده‌ستێکی له‌رزۆکدا هه‌ڵچنراوه... هه‌میشه وا ده‌هاته به‌رچاو، که ئێستا نا ساتێکی دیکه ده‌ڕمێت... ڕه‌نگی له کرمی ناو قاوغه‌کان ده‌چوو و نه‌تده‌زانی بۆچی ئه‌مه ئازارت ده‌دات... به هۆی ئه‌وه‌ی دایکی خه‌ریکی ترشیات بوو، به‌رده‌وام ئاوێکی سوور، که هه‌ر له خوێن ده‌چوو، به جۆگه‌یاندا ده‌هاته خوارێ و له‌و به‌رزاییه‌وه ده‌ڕژایه ناو جۆگه گه‌وره‌که‌ی به‌رده‌میه‌وه... حه‌زت ده‌کرد جارێک (ڤیان) ده‌رگا له‌وانه بکاته‌وه، که به مه‌به‌ستی کڕینی ترشیاته‌وه ده‌هاتن، به‌ڵام ئه‌وه هه‌ر دایکی بوو به ڕووییه‌کی خۆشه‌وه له‌و درزه‌وه ده‌رده‌که‌وت و جام و قاپه قووڵه‌کانی لێ وه‌رده‌گرتن... هه‌ر خۆیشی به پڕی بۆی ده‌هێنانه‌وه... له‌و کاته‌وه له‌و تیمه وه‌رگیرایت، ویستت ورده ورده (ڤیان) بیر خۆت ببه‌یته‌وه، به‌ڵام نه‌تده‌زانی کارێکی ئاوا له‌و ستادیۆمه‌دا چه‌ند زه‌حمه‌ته... هه‌ر کاتێ باسی سنایڵ (Snail هێلکه‌شه‌یتانۆکه) ده‌هاته گۆڕێ، تۆ داده‌ڕووخایت... ڕاستییه‌که‌ی نه‌تده‌زانی بۆچی ئه‌وان زۆرجار بۆ هێرشی ناوه‌ڕاست (CentreAttack) سنایڵیان به کار ده‌هێنا... ئایا له‌به‌ر ئه‌وه بوو، که ده‌بووایه یاریکه‌ره‌کان وه‌کو کرمه نه‌رم و لینجه‌کان بزانن که‌ی له‌و قاوغانه دێنه ده‌رێ و به‌ره‌و گۆڵ هێرش ده‌به‌ن...؟! جارێکیان ئه‌مه‌ت له (ست ساماڵ) پرسی، به‌ڵام ئه‌و به شێوه‌یه‌کی زۆر سه‌یر لێت ڕاما، به بێ ئه‌وه‌ی وه‌ڵامت بداته‌وه... له‌وه ده‌چوو له ڕێگای ئه‌و سه‌رنجانه‌یه‌وه پێت بڵێت: ((ئه‌ک داوه‌شێیت...!! ئاخر بۆیه نه‌ک هه‌ر ڕیزێرڤی تیمیت، به‌ڵکو ڕیزێرڤ بووه‌ته ناو و نازناویشت))... تۆ ته‌ریق بوویته‌وه... ئاره‌قت ده‌ردا... له‌مه‌وه نه‌توێرا نه له‌م و نه که‌سی دیکه‌ی بپرسیت... زۆرجار تۆپه‌که له به‌رچاوتدا وه‌کو هێلکه‌شه‌یتانۆکه‌یه‌کی گه‌وره خۆی نیشان ده‌دا و تۆ خه‌یاڵت ده‌ڕۆیشت... ئیتر له‌وه ده‌رده‌چوو تۆ یاریکه‌ر بیت و به مه‌به‌ستی یاری بۆ ئه‌و ستادیۆمه هاتبیت... ئه‌وه‌شت ده‌زانی، که له یاریی فوتباڵدا گرنگترین شت ئه‌وه‌یه کاتێ له‌و تۆپه ده‌ڕوانیت، خه‌یاڵت ته‌نیا لای ئه‌و بێت و به هیچ لایه‌کی دیکه‌دا نه‌ڕوات، به مانایه‌کی دیکه نابێت ڕێگا بده‌یت شێوه و جووڵه و بۆنه سه‌یره‌که‌ی زه‌فه‌ر به زه‌ینت ببه‌ن، چونکه وه‌کو له (دڵشاد ڕه‌مزی)ی کۆچتانه‌وه بیستت تۆپ هێزێکی گه‌وره‌ی هه‌یه له‌وه‌ی خه‌یاڵی مرۆڤ په‌رت بکات، بۆیه ئه‌وانه‌ی به ئاسانی خه‌یاڵیان ده‌ڕوات، هه‌رگیز نابنه یاریکه‌ری لێهاتوو... ئه‌و ده‌یوت مه‌حاڵه شاعیر و چیرۆکنووس ببنه یاریکه‌ری باش، چونکه تۆپ زۆر به ئاسانی خه‌یاڵی ئه‌وانه وردوخاش ده‌کات... ئه‌وانه‌ی له یاریی فوتباڵ سه‌رکه‌وتوو نابن، هۆیه‌که‌ی بۆ نه‌بوونی توانای ڕاکردن و فێڵ و شتی دیکه ده‌گێڕنه‌وه، به‌ڵام هۆکاری سه‌ره‌کیی ئه‌و سه‌رنه‌که‌وتنه‌یان ته‌نیا خه‌یاڵیانه، که له به‌رانبه‌ر هێزی شێوه و جووڵه و بۆنی تۆپدا خۆیان ناگرن... به‌ڵێ، ئه‌و سێ شته گه‌وره‌ترین هێزیان هه‌یه و پێویسته به‌رگه‌یان بگریت... (دڵشاد ڕه‌مزی) ده‌یوت وه‌ک چۆن قوتابی دوای ده‌وام ده‌بێت کتێبه‌کانی بخوێنێت، یاریکه‌ریش ئاوا ده‌بێت له خه‌یاڵی خۆیدا به‌رده‌وام خه‌ریکی ڕاهێنان بێت له‌سه‌ر ئه‌وه‌ی چۆن له‌و تۆپه زیاتر هه‌ست به هیچ شتێکی دیکه نه‌کات... هه‌ڵه‌ی گه‌وره ئه‌وه‌یه وا بزانیت تۆیت تۆپ هه‌ڵده‌سووڕێنیت، له کاتێکدا ئه‌وه تۆپه ئه‌و توانایه‌ی به سه‌ر تۆدا هه‌یه... چۆن ئه‌و توانایه‌ی ده‌شکێنیت...؟! به‌رده‌وام ده‌یپرسی و خۆیشی وه‌ڵامی خۆی ده‌دایه‌وه: ((خه‌یاڵت له‌سه‌ر ئه‌وه ڕابێنه، که تۆپ هیچ شێوه‌یه‌کی نییه، هیچ جووڵه‌یه‌ک ناکات و هیچ بۆنێکی لێ نایه‌ت... هه‌ستی پێ ده‌که‌یت، به‌ڵام نازانی چۆن و له چ ڕێگایه‌که‌وه))... ئه‌وان بێده‌نگ ده‌بوون و گوێیان ده‌گرت، ده‌توت له‌م دنیایه‌دا نه‌ماون، تومه‌ز ده‌یانویست ئه‌و ڕاستییانه له خه‌یاڵی خۆیاندا بچه‌سپێنن، به‌ڵام تۆ به ته‌نیا ئاگات له جووڵه و هه‌ڵسوکه‌وتیان ده‌ما، بگره گاڵته‌ت له‌و گوتانه ده‌هات و ده‌ترسایت له قاقای پێکه‌نین بده‌یت... (دڵشاد ڕه‌مزی) درێژه‌ی به قسه‌کانی ده‌دا: ((هه‌ر کاتێ ئه‌م سێ شته‌ت توانی، ئه‌وا تۆپ هیچ ده‌سته‌ڵاتێکی نامێنێت و تۆ به ئاره‌زووی خۆت ده‌یجووڵێنیت))... ڕێک پێچه‌وانه‌ی ئه‌وانه‌ی ئه‌و ده‌یوتن، له تۆدا هه‌بوون... هه‌میشه تۆپت له شێوه‌ی هێلکه‌شه‌یتانۆکه‌دا ده‌بینی و جووڵه‌ی کرمه نه‌رم و لینجه‌کانیشی بیر ده‌خستیه‌وه، کاتێ به دوو شاخی هه‌ستیاره‌وه له قاوغه‌کان ده‌هاتنه ده‌رێ و له‌سه‌ر ئه‌و زه‌وییه ده‌خشین، به‌ڵام بۆنی تۆپی فوتباڵ هه‌ر له زووه‌وه هه‌ستێکی سه‌یری پێ ده‌به‌خشیت... نا، نه‌تده‌توانی لێی تێبگه‌یت... ڕاستییه‌که‌ی بۆنه‌که له دایکت ده‌هات، به‌ڵام هه‌میشه وای بۆ ده‌چوویت هیی پیاوێکی نه‌ناسراوه، که نازانیت که‌ی و چۆن گه‌یشتووه‌ته سه‌ر جێگاکه‌ی... له‌وساوه به ئاسانی له‌وه تێده‌گه‌یت، که چ ئازارێکی گه‌وره‌یه، تۆ بڵێ چ نه‌هامه‌تییه‌که لووتێکی هه‌ستیارت هه‌بێت... هه‌ر ئه‌مه‌ش پاڵی پێوه ده‌نایت هه‌ندێجار به‌زه‌ییت به باوکتدا بێته‌وه، بگره چاو له هه‌ڵه و گوناهه‌کانیشی بپۆشیت، به‌وه‌ی ئه‌ویش به ده‌ست لووتێکی ئاوا بڵحه‌وه ده‌تلایه‌وه... تۆی ڕیزێرڤ له‌و ستادیۆمه بیر و هۆشت له‌و شتانه ده‌ئاڵا... له کاتێکدا ده‌بووایه به هیچ شێوه‌یه‌ک ئاگات له تۆپه‌که نه‌بڕێت و خه‌یاڵت له‌و زیاتری تێدا نه‌بێت، که‌چی ئه‌و تۆپه هه‌ر خۆی وه‌ک بڵێی به ڕاستی پۆڵا بێت، نه‌وه‌ک چه‌رم و به‌ر خه‌یاڵی شووشه‌ییت بکه‌وێت، ئاوا به هێزێکی گه‌وره‌وه به‌ری ده‌که‌وت و ده‌یکرده هه‌زاران پارچه‌ی ورد ورد... وێنه‌ی په‌ڕی که‌ناری و پووش و گه‌ردی خۆڵ به ئاسمانیدا ده‌بردن... نه‌خێر، تۆ به‌و لووته هه‌ستیاره و به‌و ڕابردووه پڕ له ئازاره‌ته‌وه نه‌ده‌کرا خه‌یاڵت له‌سه‌ر ئه‌وه ڕابێنیت، که تۆپ هیچ شێوه‌یه‌کی نییه، هیچ جووڵه‌یه‌ک ناکات و هیچ بۆنێکی لێ نایه‌ت، به‌ڵام هاوکات ئه‌مه مانای ئه‌وه نه‌بوو تۆ شاعیر و چیرۆکنووسیت... هه‌موو ئه‌و هه‌وڵانه‌ی له بواری شیعر و چیرۆکیشدا ده‌تدان، کورتیان ده‌هێنا... گوناهه‌که‌شت ده‌خسته ئه‌ستۆی لووتته‌وه... ئه‌گه‌ر بایه‌خت به هونه‌ری سیرامیکیش داوه، ئه‌وه‌شیان هه‌ر پێوه‌ندیی به‌و لووته‌ته‌وه هه‌یه... له منداڵی هه‌میشه وات ده‌زانی ڕایه‌ڵێک له‌نێوان بۆنی قوڕ و ئه‌و بۆنه سه‌یره‌دا هه‌یه، که له دایکت دێت و وایشی بۆ ده‌چوویت هیی پیاوێکی نه‌ناسراوه... ده‌تویست له قوڕ ئه‌و پیاوه بخوڵقێنیت... هه‌تا ده‌هات زیاتریش له ئه‌قڵت ده‌چه‌سپی، که هه‌ر کاتێ شێوه‌ی ڕاسته‌قینه‌ی ئه‌و پیاوه‌ت به‌رجه‌سته کرد، ئه‌وا گیانی دێته به‌ر و ده‌توانی هه‌موو شتێکی لێ بپرسیت... ((ئه‌وه‌ی توانای هه‌بێت له قوڕ گیان و جه‌سته بخوڵقێنێت، توانای ئه‌وه‌یشی ده‌بێت بیهێنێته قسه و له نهێنییه‌کانی تێبگات، به‌ڵام ئایا ئه‌وه هه‌تا بڵێی سه‌یر نییه، که گیانێک خۆت خاڵقیتی و لێی تێناگه‌یت، هه‌تا ئه‌و خۆی زمان نه‌گرێت و بۆت نه‌دوێت...؟! بڕوانه زمان چ هێزێکی سه‌رسووڕهێنه...!! ده‌سته‌ڵاتی به سه‌ر خالیقی خۆشیدا هه‌یه...!!))... به‌رده‌وام ده‌ستت له‌ناو قوڕدا بوو... ڕۆژانه پیاو له دوای پیاوت ده‌خوڵقاند، به‌ڵام هه‌رکه ده‌تزانی هیچ یه‌کێ له‌مانه ئه‌وه نییه، که تۆ بۆی ده‌گه‌ڕێیت، هه‌ڵتده‌وه‌شاندنه‌وه... بۆت ده‌رکه‌وت خوڵقاندنیش شێوه‌یه‌کی دیکه‌ی کوشتنه، مادام تۆ به دوای که‌سێکی دیاریکراودا ده‌گه‌ڕێیت و هه‌رگیز ناشیدۆزیته‌وه... مردن بۆیه هه‌یه، چونکه ئه‌و وێنه دیاریکراوه مه‌حاڵه بدۆزرێته‌وه... چۆن بدۆزرێته‌وه، ئه‌گه‌ر له شێوه‌ی تارمایی بێته به‌رچاو، یان ته‌نیا له‌ناو خه‌یاڵدا سه‌ره‌تاتکێ بکات...؟! ڕێگایه‌کی دیکه‌ت گرته به‌ر... هه‌ر له قوڕ شوێنه دێرینه‌کانت ده‌خوڵقاند... سه‌ره‌تا به گۆڕستانه‌کان ده‌ستت پێ کرد... له‌ناو ئه‌و باخه‌دا ده‌یان گۆڕت قوت ده‌کرده‌وه... دایکت تووڕه ده‌بوو و ده‌یڕماندن... نه‌ده‌کرا پێی بڵێیت له‌و پیاوه ده‌گه‌ڕێیت، که له‌گه‌ڵ ئه‌ودا ده‌خه‌وێت و که‌سیش نایبینێت... بۆنه‌که‌ی جێ ده‌مێنێت و ته‌نیا لووتی تۆ (ڕه‌نگه هیی باوکیشیت) هه‌ستی پێ ده‌کات... ئه‌مجاره‌یان پشتت له گۆڕستان و ڕووت له قه‌ڵا و گومبه‌زه‌کان کرد... له‌وێشه‌وه بۆ مناره‌ی چۆڵی... ئه‌مه‌یان له‌وانی دیکه زیاتر بووه شوێنی بایه‌خی تۆ... هه‌ستت ده‌کرد هه‌موو نهێنییه‌کان له‌و مناره‌یه‌دا خۆیان حه‌شار داوه، به‌ڵام هه‌رگیز وه‌ک ئێستا نه‌ده‌چووه ئه‌قڵته‌وه، که مرۆڤ ده‌توانێت بۆ ماوه‌یه‌کی دیاریکراو مردووی خۆی له‌وێ بێنێته‌وه، به مه‌رجێ ئه‌و که‌سه به شێوه‌یه‌کی یاسایی گیانی له ده‌ست دابێت... یان وه‌ک گوتمان ڕه‌نگه زانیبێتت و به هۆی شۆکێکه‌وه بیرت چووبێته‌وه... وه‌ره با لاکه‌ی دیکه‌ی ئه‌و مه‌سه‌له‌یه‌ت نیشان بده‌م:
بیرۆکه‌ی خه‌ڵقکردن و کوشتن، که لای مرۆڤ گه‌ڕانه به دوای وێنه‌یه‌کی په‌نهان و ته‌ڵخدا و دۆزینه‌وه‌ی مه‌حاڵه؛ سه‌ره‌تا وه‌کو یاریی منداڵان وایه و دوایی ورده ورده له‌گه‌ڵیدا گه‌وره ده‌بێت... ئه‌وسا به بێ ئه‌وه‌ی ئاگای لێ بێت، یان ویستبێتی ئه‌و بیرۆکه‌یه لێیه‌وه دزه ده‌کات و به دنیادا بڵاو ده‌بێته‌وه... هه‌تا زیاتر خه‌ڵک باوه‌ڕی پێ بهێنن و ئاماده بن به‌رگریی لێ بکه‌ن، پتر ده‌چێته باری جیدییه‌ته‌وه و که‌متر سیمای یاریی منداڵانی پێوه دیار ده‌مێنێت... ئێستا هیچ به دووری مه‌بینه بیرۆکه‌ی هێنانه‌وه‌ی مردوو له‌م مناره‌یه‌وه له تۆوه داکه‌وتبێت و ئه‌وانی دیکه باوه‌ڕیان پێ هێنابێت، چونکه تۆ به‌و لووته هه‌ستیاره و به‌و ئه‌قڵه ساوایه‌ته‌وه له پیاوێکی نه‌ناسراودا ده‌گه‌ڕایت و ده‌تویست بیهێنیته‌وه... دواجار باوه‌ڕت هێنا له‌و مناره‌یه‌دا خۆی حه‌شار داوه... به‌ڵام ئاسان نییه ئه‌مه به خۆشت بڵێیت، چجای به‌وانی دیکه... بۆ ئه‌وه‌ی گه‌وره‌ترین سه‌رسامی له په‌لوپۆت نه‌خات، ده‌بێت هه‌ر خێرا به لاوه‌ی بنێیت، بگره ده‌بێت وا بزانیت ئه‌مه غایه‌له‌یه و هه‌رگیز بیرۆکه‌ی وا لای تۆوه سه‌ری هه‌ڵنه‌داوه......
دوای هه‌موو ئه‌مانه وه‌ره پێم بڵێ ئه‌گه‌ر هه‌ر به ڕاستی له ڕێگای قوڕه‌وه ئه‌و پیاوه‌ت بدۆزیایه‌ته‌وه، ده‌توێرا له چاوانی ڕابمێنیت...؟! توانات هه‌بوو له‌گه‌ڵیدا بدوێیت...؟! ئایا ئه‌وه چه‌ند بڵێی سه‌یر نییه، که خالیق نه‌وێرێت له‌گه‌ڵ مه‌خلووقی خۆیدا بدوێت...؟! پرسیاری دیکه‌م زۆر ماون و ئه‌مانه‌ش هه‌ندێکیانن: ئایا تۆ ڕقت له‌و پیاوه بوو...؟! ده‌تویست بیخه‌یته شوێنی باوکته‌وه، یان مه‌به‌ستت بوو له جیاتی ئه‌و بیکوژیت...؟! ده‌زانم (له جیاتی ئه‌و بیکوژیت)، مانایه‌کی دووسه‌ره‌ی هه‌یه... له لایهک واته له جیاتی ئه‌وه‌ی باوکت به ده‌ستی خۆی بیکوژێت، تۆ ده‌یکوژیت و له لایه‌کی دیکه مانای وایه تۆ له‌به‌ر هه‌ر هۆیه‌ک بێت، له ده‌ستت نایه‌ت باوکت بکوژیت، بۆیه له جیاتی ئه‌م، ئه‌و پیاوه ده‌کوژیت... من هه‌ردوو لایم مه‌به‌سته... باشه تۆ ئه‌وانت به دوژمنی یه‌کتر ده‌زانی...؟! مه‌به‌ستم باوکت و ئه‌و پیاوه نه‌ناسراوه‌یه... ئه‌گه‌ر ئه‌وان دوژمنی یه‌کتر بوون، تۆ لایه‌نی کامیانت ده‌گرت...؟! ئێستا باوکتی لێ ده‌ربکه، به‌ڵام ئه‌گه‌ر بتدۆزیایه‌ته‌وه، ده‌تکوشت...؟! چ حیکمه‌تێک له‌وه‌دایه تۆ وه‌کو خالیقێک به‌و نموونه‌یه بگه‌یت، که له‌وه‌ته‌ی هه‌یت له خه‌یاڵتدا خۆی حه‌شار داوه و دواییش ده‌یکوژیت...؟! که‌واته جیاوازیی نێوان ئه‌م نموونه ڕاسته‌قینه‌یه و ئه‌وانی پێشوو چییه، ئه‌وانه‌ی هه‌ر کاتێ هه‌ستت ده‌کرد به هه‌ڵه خه‌ڵقت کردوون، خێرا ده‌تکوشتن...؟! ئایا پیاوێک خۆت خه‌ڵقت کردبێت، بۆی هه‌یه ئه‌ویش وه‌ک باوکت له‌گه‌ڵ دایکتدا بخه‌وێت...؟! بۆی هه‌یه ببێته باوکی منداڵی، یان منداڵه‌کانی...؟! ئه‌و منداڵانه ده‌بنه چی تۆ...؟! ئایا پیاوێک تۆ خه‌ڵقت کردبێت و به فه‌رمانی تۆ هه‌ڵسووڕێت، ده‌توانێت حه‌زی بچێته سه‌ر دایکت و له‌گه‌ڵی ڕاببوێرێت...؟! کێ له‌م گوناهانه به‌رپرسیاره...؟! پێویست ناکات وه‌ڵامم بده‌یته‌وه، چونکه من زۆر چاکت ده‌ناسم ڕیزێرڤ... له‌وساوه، که نه‌تزانی دایکت چی به سه‌ر هات و بۆ کوێ سه‌ری هه‌ڵگرت، به یه‌کجاری ده‌ستت له‌وه هه‌ڵگرت به دوای ئه‌و پیاوه‌شدا بگه‌ڕێیت، بگره ویستووته به هه‌موو شێوه‌یه‌ک له خه‌یاڵی خۆتی ده‌ربکه‌یت... ئایا دایکت له‌گه‌ڵ ئه‌ودا ڕۆیشت...؟! ده‌زانم ناته‌وێت ئه‌و شتانه‌ت بیر بکه‌وێته‌وه، به‌ڵام من بیرت ده‌خه‌مه‌وه... وا نه‌زانی چیرۆکی (ڤیان)یشم بیر چووه‌ته‌وه... نه‌خێر، بیرم نه‌چووه‌ته‌وه، به‌ڵام ئه‌وه ته‌کنیکی گێڕانه‌وه‌یه ئه‌مه‌م به سه‌ردا ده‌سه‌پێنێت، که بابه‌ته‌که به سه‌ر ده‌یان پارچه‌ی ورد ورددا دابه‌ش بکه‌م، ڕێک وه‌ک ئه‌وه‌ی تۆپه‌که به‌ر خه‌یاڵی تۆ ده‌که‌وت و وردوخاشی ده‌کرد... په‌یتا په‌یتا بیرتی ده‌خه‌مه‌وه و ناهێڵم له‌ژێر ده‌ستم ده‌ربچیت... مادام باسی تۆپه‌که‌ش له ئارادایه، ئه‌وا ئێمه له ناوجه‌رگه‌ی چیرۆکه‌که‌داین، چونکه له لایهک شێوه‌ی له هێلکه‌شه‌یتانۆکه ده‌چێت و له لایه‌کی دیکه بۆنه‌که‌ی هه‌مان بۆنی دایکته، یان با بڵێین بۆنی ئه‌و پیاوه‌یه، که که‌س نه‌یده‌زانی چۆن ده‌گه‌یشته سه‌ر ته‌ختی نووستنه‌که... خانووه ته‌نیاکه‌ی ماڵی (ڤیان)یش له به‌ر دیده‌تدا قوت ده‌بێته‌وه، که هه‌رچه‌ند له دووره‌وه لێیت ده‌ڕوانی، وه‌کو هێلکه‌شه‌یتانۆکه ده‌هاته به‌رچاوت، بۆیه گوته‌که‌ی له گوێچکه‌تدا ده‌زرینگایه‌وه: ((نا، نایه‌نه ده‌رێ... ده‌ترسن... خۆ ئه‌وان ده‌زانن ئێستا ماڵیان له‌سه‌ر ده‌ستی تۆیه))... ئینجا هه‌ر به ڕاستی ئه‌م وه‌کو کرمه نه‌رم و لینجه‌کان له‌ناو قاوغدا ده‌ژیا، به‌ڵام هه‌رگیز نه‌تده‌بینی بێته ده‌رێ... ئێستا منیش به‌م تۆپه‌ی ده‌ستم تۆم خستووه‌ته قاوغه‌وه و هه‌ردوو سه‌رم لێ گرتوویت... ناتوانیت به هیچ لایه‌کدا ڕا بکه‌یت... ئه‌گه‌ر چاوت دابخه‌یت و نه‌ته‌وێت له شێوه‌ی هێلکه‌شه‌یتانۆکه‌دا بیبینیت، خۆ ناتوانیت لووتیشت بگریت و بۆنه‌که‌ی هه‌ڵنه‌مژی... چ بینین و چ بۆنکردنی ئه‌و تۆپه ده‌تباته‌وه ناو ڕابردووت... هه‌تا ئێستا هه‌ر خۆت بۆ ڕابردووی خۆت ده‌گه‌ڕایته‌وه، خۆت ئازاد بوویت بچیته کوێی ئه‌و ڕابردووه‌ت و نه‌چیته کوێیشی، به‌ڵام له‌مه‌ودوا منم به ئاره‌زووی خۆم هه‌ڵتده‌سووڕێنم... ده‌تبه‌مه ئه‌و شوێنانه‌ی، که به یه‌کجاری پشتت تێ کردوون و هه‌رگیز ناته‌وێت بیانبینیته‌وه...
__________________
شاره که م , به ندی دلم , ئه ی باغی مه ن
ره وره وه ی ساوایه تیم , سابلاغی مه ن
دل به هیوات لیده دا , لانکی دلی
تو له وه رزی یادی مه ن دا , سه رچلی
خالید حسامی( هیدی )
|
05-28-2012
|
|
مدیر تاریخ و بخش فرهنگ و ادب کردی |
|
تاریخ عضویت: Aug 2009
محل سکونت: مهاباد
نوشته ها: 19,499
سپاسها: : 3,172
3,713 سپاس در 2,008 نوشته ایشان در یکماه اخیر
|
|
چیرۆک ( 6)
کاروان عومه‌ر کاکه‌سوور
به‌ڵێ، تۆ ئێستا له‌ناو قاوغێکدایت... ئه‌گه‌ر نه‌یه‌یته ده‌رێ، ئه‌وا له‌وێ ڕه‌ق ده‌بیته‌وه... له‌ناو ئه‌و سه‌رسامی و ترسه‌دا زه‌نده‌قت ده‌چێت... له هه‌ر کاتێکی دیکه زیاتر هه‌ست ده‌که‌یت، که نه‌وه‌ی یه‌کێک له ئه‌ندازیار و شاگرده‌که‌یت، چونکه ئه‌وه‌تا هه‌مان چاره‌نووس دووباره ده‌بێته‌وه... ئه‌گه‌ر شاگرده‌که توانیی له ده‌رگای دووه‌م بێته ده‌رێ و سه‌ری خۆی هه‌ڵبگرێت، ئه‌وا تۆ وه‌ک ئه‌و چانسی ده‌ربازبوونت نییه، بۆیه ده‌بێت وێنه‌ی ئه‌ندازیاره‌که، به‌ڵام به هه‌ندێک جیاوازییه‌وه بمریت... چاوه‌ڕێیش نه‌که‌یت به مۆڵه‌ت بگه‌ڕێیته‌وه، چونکه تۆ که‌ست نه‌ماوه بتهێنێته‌وه... خوشکێکی شێتت هه‌یه و له‌به‌ر مشک و پشیله ئاگای له دنیا بڕاوه... هاکه ئه‌ویش ژه‌هری پشیله‌ی خوارد و ئه‌م دنیایه‌ی جێ هێشت...!! هه‌تا له ژیانیشدایه، له باوکت زیاتر که‌سی دیکه ناهێنێته‌وه... ئه‌رێ مادام ئێستا لای (تابان)ین، با هه‌ڵوێسته‌یه‌ک بکه‌ین... تۆ له ڕێگای قوڕه‌وه له پیاوێکی نه‌ناسراودا ده‌گه‌ڕایت و ده‌تویست بیدۆزیته‌وه، چونکه وات ده‌زانی ئه‌و پیاوه پێوه‌ندیی له‌گه‌ڵ دایکتدا هه‌یه... وایه...؟! ده‌ڵێی ((به‌ڵێ))... زۆر چاکه... نه‌تتوانی بیدۆزیته‌وه و کۆڵت دا... ئه‌مه‌شیان ڕاسته... ئایا به دووری ده‌بینیت (تابان)ی خوشکیشت، به حوکمی ئه‌وه‌ی ئه‌ویش نه‌وه‌ی یه‌کێک له ئه‌ندازیار و شاگرده‌که‌یه؛ بیرێکی له‌م چه‌شنه‌ی تۆی کردبێته‌وه...؟! وتت: ((نا))... ده‌ی زۆر باشه... ئه‌رێ ناشێت ئه‌ویش به شێوه‌یه‌ک له شێوه‌کان تارماییی ژنێکی له باوکتدا به‌دی کردبێت، بگره به دواشیدا گه‌ڕابێت...؟! شتێکی دیکه‌م پێ بڵێ ڕیزێرڤ... ئه‌وه بۆچی (تابان) وا ته‌مه‌نی له چل نزیک ده‌بێته‌وه و دایکی منداڵێکی حه‌وتساڵانه، که‌چی به‌رده‌وام خۆڵ ده‌خوات...؟! ئه‌و پێوه‌ندییه چییه هه‌ر یه‌ک له ئێوه، به‌ڵام به شێوازی جیاواز له‌گه‌ڵ خۆڵدا هه‌تانه...؟! ئه‌مانه هه‌ر پرسیارن و به‌س، ئه‌گینا تۆ له ژیاندا نه‌ماویت، هه‌تا زمانت مابێت و وه‌ڵامی منی پێ بده‌یته‌وه... ته‌نیا ڕابردووت بیر ده‌خرێته‌وه و له تواناشتدا نییه نکووڵی له کرداره‌کانت بکه‌یت... ئه‌مه حاڵی هه‌ر که‌سێکه، که ده‌مرێت و لێپرسینه‌وه‌ی له‌گه‌ڵدا ده‌کرێت... ده‌بێت ئه‌وه‌ش بزانیت، که تۆ به ڕێگایه‌کی زۆر جیاواز مردیت، بۆیه گه‌ڕانه‌وه‌شت مه‌حاڵه... تۆ له‌ناو هێلکه‌شه‌یتانۆکه‌یه‌کدا گیانت سپارد... ده‌زانم ئه‌مه شتێکی یه‌کجار زۆر بێمانایه، یاخود با بڵێین گه‌ڕانه‌وه‌یه بۆ ئه‌قڵی منداڵی و له یاریی منداڵانیش ده‌چێت، که مرۆڤێک به‌و هه‌موو زلییه‌ی خۆیه‌وه له‌ناو قاوغی کرمدا بمرێت، به‌ڵام بیرت نه‌چێت هه‌ر ئه‌و شته بێمانایانه‌ن کاتێ دزه ده‌که‌ن، که‌س نازانێت چۆن ئاوا خێرا به دنیادا بڵاو ده‌بنه‌وه... هه‌تا زیاتریش خه‌ڵک باوه‌ڕیان پێ بهێنن و ئاماده بن به‌رگرییان لێ بکه‌ن، پتر ده‌چنه باری جیدییه‌ته‌وه و که‌متر سیمای یاریی منداڵانیان پێوه دیار ده‌مێنێت... (سیروان فه‌رید)ی هاوڕێت (یان ڕه‌نگه ناوێکی دیکه‌ی نزیک له‌وه‌ی هه‌بووبێت، به‌ڵام تۆ له‌م حاڵه‌ی ئێستاتدا وات بیر بکه‌وێته‌وه)؛ ده‌یگوت بیرۆکه‌ی به‌هه‌شت بۆ ئه‌و کاته ده‌گه‌ڕێته‌وه، که منداڵ له سکی دایکیدا بووه... بێخه‌م ژیاوه و تامی نیگه‌رانیی نه‌چه‌شتووه... زۆر به ئاسانی له ڕێگای وێڵداشه‌وه خۆراکی پێ گه‌یشتووه... به‌ڵام ئێمه باسی گۆڕانی سیمای منداڵانه‌ی بیرۆکه‌کان ده‌که‌ین ڕیزێرڤ... ئه‌وه‌ی ئه‌و سیمایه‌ش ده‌گۆڕێت، یان به مانایه‌کی دیکه ئه‌وه‌ی ئه‌و بیرۆکه‌یه له یارییه‌کی ساده‌ی منداڵانه‌وه بۆ مه‌سه‌له‌یه‌کی هه‌ستیار و گرنگی گه‌ورانه‌وه ده‌گۆڕێت، خوێنه... به‌ڵێ، ڕژانی دڵۆپێک خوێن به‌سه، هه‌تا ئه‌و حه‌ماسه جۆش بستێنێت و سارد نه‌بێته‌وه... کێ ده‌یوت ڕۆژێک له ڕۆژان (ڤیان) دێته‌وه...؟! به‌ڵام ئه‌وه‌تا برای هێناویه‌تیه‌وه و وا ده‌شیگه‌ڕێنێته‌وه... خۆت چاک ده‌زانیت بۆچی ئێستا له ڕێگای خوێنه‌وه ئه‌و کچه‌ت بیر ده‌خه‌مه‌وه... خوێنیش هه‌ر خوێنه، جا هیی په‌ڕه‌سێلکه بێت یان هیی کونه‌په‌پوو وه‌کو له چیرۆکی (خوێنی کونه‌په‌پوو)ی یه‌کێک له هاوڕێکانی منداڵیتدا خوێندووتته‌وه... خوێن هیی پاکیزه بێت یان هیی سۆزانی، هیچ جیاوازییه‌کی نییه... خوێنه و وه‌ک دۆی داده ڕژاوه... هه‌ر ئه‌و هاوڕێ چیرۆکنووسه‌ت جارێکیان پێی وتی: ((ئه‌و باسه‌ى به خوێن ده‌ست پێ ده‌کات، به چاوپۆشین له‌وه‌ی خوێنى کێیه و به چ مه‌به‌ستێک رژێنراوه، زۆر درێژه ده‌خايه‌نێت... هه‌زاران لقی لێ ده‌بێته‌وه...))... به‌ڵام تۆ چاک ده‌زانی خوێنی (ڤیان) کێ ڕشتی و به چ مه‌به‌ستێکیش ڕژێنرا، بۆیه ناهێڵم لقوپۆپی لێ ببێته‌وه... ئێستا ئه‌گه‌ر زمانت پێ ببه‌خشم، تا تینت تێدایه هاوار ده‌که‌یت: ((من نه‌مکوشتووه... من نه‌مکوشتووه))، به‌ڵام تۆ مافی قسه‌کردنت نییه و ده‌بێت ته‌نیا گوێ بگریت... به‌ڵێنت ده‌ده‌مێ ئه‌گه‌ر ددانت به گوناهی خۆتدا نا، من زمانت پێ ده‌به‌خشمه‌وه... ده‌زانم هه‌موو تاوانه‌که ناکه‌وێته ئه‌ستۆی تۆوه، به‌ڵکو که‌سانی دیکه‌ش تێیدا به‌شدارن، به‌ڵام با بزانین تۆ چه‌ندت به‌ر ده‌که‌وێت......
باشه ئه‌وه بۆچی کاتێ باسی خوێنی سۆزانیم کرد، تۆ ئاوا زیاتر په‌شۆکایت...؟! ئه‌رێ تۆ ئێستاش پێت وایه (ڤیان) بۆیه کوژرا، چونکه سۆزانی بوو...؟! ئایا کاتێ مردووه‌کان بۆیان هه‌بێت بگه‌ڕێنه‌وه، سۆزانییه‌کان ده‌بنه مایه‌ی شه‌رمه‌زاری بۆ مرۆڤ، با ئه‌وانه دایک، خوشک، هاوسه‌ر و کچی خۆیشی بن...؟! خۆ ئاگات لێ بوو (سامان) چۆن باسی دایکی ده‌کرد...؟! ئێستاش که له شوێنی خۆی وه‌ک مناره وه‌ستاوه و نابزوێت، ئه‌وا ده‌شێت بیر له هێنانه‌وه‌ی دایکی بکاته‌وه، یان ڕه‌نگه ئه‌ویش وه‌ک تۆ مردبێت و زمانی لێ سه‌ندرابێته‌وه... بیرت نه‌چێت ئێره لای مناره‌یه و سنووری نێوان زیندوو و مردوو تاڵه‌موویه‌که... لێره‌دا ناکرێت به سه‌ر ئه‌و پرسیارانه‌دا باز هه‌ڵبده‌م، که ئاخۆ باوکه باخه‌وانه‌که‌ی (ڤیان) ده‌یزانی مرۆڤ بۆی هه‌یه مردووی خۆی بێنێته‌وه...؟! ئایا کوژرانی (ست ساماڵ) به ده‌ستی (سامان)ی کوڕی و کوژرانی (ڤیان) له‌سه‌ر قسه‌ی باوکی هه‌مان مه‌به‌ستیان له پشته‌وه بووه...؟! بۆیه ده‌ڵێم: ((له‌سه‌ر قسه‌ی باوکی)) و ناڵێم ((به ده‌ستی باوکی))، چونکه (ڤیان) به خه‌نجه‌ری ئامۆزاکه‌ی کوژرا... ئه‌و کوڕه کاتێ ده‌یه‌وێت ڕوو له شاخ بکات و چه‌ک هه‌ڵبگرێت، مامی پێی ده‌ڵێت مادام ئه‌و ده‌چێته ده‌ره‌وه، با به ده‌ستی خۆی ئامۆزاکه‌ی بکوژێت، که بووه‌ته سۆزانییه‌ک و له سه‌رتاپێی شاردا ده‌نگی داوه‌ته‌وه... ئه‌ویش وه‌ک یه‌که‌مین چالاکیی شۆڕشگێڕانه ورگی هه‌ڵده‌دڕێت... تۆ له‌وه دڵنیایت (دلاوه‌ر) زانیویه‌تی، که مرۆڤ بۆی هه‌یه مردووی خۆی بێنێته‌وه، نه‌وه‌ک له‌به‌ر ئه‌وه‌ی وا لێره ده‌یبینیت قۆڵی له قۆڵی خوشکه‌که‌ی هه‌ڵکێشاوه و بۆ مناره‌ی ده‌باته‌وه، به‌ڵکو ئه‌وساش به شێوه‌یه‌ک له‌باره‌ی خوشکه‌که‌یه‌وه ده‌دوا، که به لای تۆوه زۆر سه‌یر بوو... باوکیشی به‌رده‌وام پێی گوتووه، که با به ده‌ستی خۆی ورگی خوشکه‌که‌ی هه‌ڵبدڕێت، به‌ڵام ئه‌م گوێی لێ نه‌گرتووه... ئه‌ویش پێی گوتی، که (ڤیان) سه‌ره‌تا له‌گه‌ڵ باوکتدا پێوه‌ندیی دامه‌زراندووه و دواتر پیاوی دیکه‌ی ناسیوه... هیچ له‌وه تێنه‌ده‌گه‌یشتی ئه‌وانه چۆن و که‌ی و له کوێ به یه‌کتر گه‌یشتوون، له کاتێکدا تۆ ئه‌وه‌نده هه‌وڵت ده‌دا ته‌نیا جارێک له به‌رده‌گای خۆیاندا بیبینیت و سه‌ری نه‌ده‌گرت... سه‌ره‌تا پێوه‌ندییه‌که‌یان ئاسایی بووه، به‌ڵام وه‌ک دوایی ده‌رکه‌وت باوکت چێژی له هیچ ژنێک نه‌بینیوه، ئه‌گه‌ر سۆزانی نه‌بووبێت، بۆیه هه‌ر خۆی پاڵی به (ڤیان)یشه‌وه ناوه ئه‌و ڕێگایه بگرێت... (دلاوه‌ر) ده‌یوت له‌گه‌ڵ ئه‌وه‌شدا خوشکه‌که‌ی له‌گه‌ڵ بێژمار پیاودا چووه‌ته سه‌ر جێگا، به‌ڵام هه‌ر دڵی به تۆوه‌یه و هه‌رگیز ئه‌و ڕۆژانه‌ی بیر ناچێته‌وه، که له‌ناو هێلکه‌شه‌یتانۆکه‌کاندا بۆت له‌سه‌ر پشت ڕاده‌کشا... هه‌میشه هیوای خواستووه بۆ تۆ بگه‌ڕێته‌وه... پێی وابووه ئه‌مه گه‌ڕانه‌وه‌یه بۆ سه‌رده‌می منداڵی، که له هه‌ر شتێکی دیکه زیاتر بۆی به په‌رۆشه... ده‌تزانی که تۆش هه‌مان هه‌ستت له ئاستی ئه‌ودا هه‌یه، به‌ڵام ئه‌وه‌ی ناهێڵێت بڕیارێکی ئاوا بده‌یت، ته‌نیا ئه‌وه‌یه، که ئه‌و له‌گه‌ڵ باوکتدا خه‌وتووه... تۆش به‌و لووته هه‌ستیاره‌ته‌وه ئه‌گه‌ر بتوانی هه‌موو ئه‌و پیاوانه‌ی دیکه له بیر خۆت ببه‌یته‌وه، که له‌گه‌ڵیدا ڕایانبواردووه، به‌ڵام سوور ده‌زانی ناتوانی دیمه‌نی باوکت له به‌رچاوت لاببه‌یت و بێگومان ئه‌و بۆنه‌ی ئۆقره‌ت لێ ده‌بڕێت... ئه‌مه‌ش مانای وایه باوکت له هه‌ر جووڵه و بیرکردنه‌وه و ئاره‌زوویه‌کتدا بوونی هه‌یه، بگره له‌گه‌ڵتدا هاوبه‌شه... له کاتی نانخواردن، خۆشتن، پیاسه‌ی ئێواران و ده‌ستبازیی سه‌ر ته‌ختی نووستندا له‌گه‌ڵتاندایه و لێتان جیا نابێته‌وه... هه‌ستێکی ئاواش به‌سه، هه‌تا مرۆڤ به‌رگه‌ی نه‌گرێت و خۆی بکوژێت... له‌مه‌شه‌وه بۆت ده‌رکه‌وت بۆچی ئه‌و هه‌موو که‌سه به درێژاییی مێژووی بنه‌ماڵه‌که‌تان، که ڕوون نییه له ئه‌ندازیاره‌که‌وه درێژ ده‌بێته‌وه، یان له شاگرده‌که‌وه؛ خۆیان کوشتووه، تومه‌ز ئه‌و شێتییه پشتاوپشت له‌گه‌ڵتاندا هاتووه... به‌ڵێ، چاک ده‌تزانی بۆنی باوکت به سه‌ر جه‌سته و هه‌ناسه‌کانی (ڤیان)ه‌وه نابڕێته‌وه و هێنده‌ی دیکه ژیانت لێ تاڵ ده‌کات... تۆ به‌رده‌وام ئه‌و گوناهه‌ت خستووه‌ته ئه‌ستۆی لووتته‌وه، وه‌ک بڵێی ئه‌و لووته به که‌سێکی دیکه‌وه بێت، نه‌وه‌ک به خۆته‌وه، یان ڕه‌نگه ویستبێتت وا باوه‌ڕ به خۆت بهێنیت، که لووتت خواوه‌ندێکه، له‌سه‌ره‌وه فه‌رمان ده‌رده‌کات و تۆ له خواره‌وه جێبه‌جێی ده‌که‌یت... به‌ڵام له‌و ڕێگایه‌وه هه‌وڵت داوه پاساو بۆ گوناهه‌کانت بێنیته‌وه... تۆ ناتوانی به‌م شتانه من بخه‌ڵه‌تێنیت... ئه‌گه‌ر ده‌ته‌وێت زمانت پێ بده‌مه‌وه، ده‌بێت له‌گه‌ڵ یه‌که‌م قسه‌تدا داوای لێبوردن له (ڤیان) بکه‌یت:
_ تکام وایه لێم ببووریت... من هه‌ڵه بووم.
_ نا، پێویست ناکات داوای لێبوردن بکه‌یت ڕیزێرڤ گیان... من وه‌ک پێم گوتی له تۆ دڵگران نیم، به‌ڵام نازانم بۆچی هێنده به‌وه تێکده‌چم، کاتێ خه‌ڵک وا ده‌زانن دایکم له‌پێناوی پاره‌دا ڕایبواردووه... که‌مێکی دیکه ده‌یهێنمه‌وه و خۆت هه‌موو شتێکی لێ بپرسه... با هه‌ر خۆیشی پێت بڵێت، که من بۆچی ئه‌وم کوشتووه.
ناته‌وێت پێی بڵێیت له‌گه‌ڵ ئه‌وت نییه... دوودڵی له‌وه‌ی ئاخۆ باسی (ڤیان)ی بۆ بکه‌یت، یان نا... ئه‌ویش هه‌ر ده‌ڵێی له خه‌وێکی قووڵدا به ئاگا هاتووه‌ته‌وه، وا به سه‌رسووڕمانه‌وه له ده‌وروبه‌ری خۆی ڕاده‌مێنێت... دیسان قۆڵ به قۆڵتدا ده‌کاته‌وه و به‌ره‌و مناره‌ت ده‌بات... ئه‌مه زیاتر ده‌تترسێنێت... ناهه‌قت نییه، ئه‌گه‌ر وا بزانیت مردوویت... تاکه جیاوازییشت له‌گه‌ڵ مردووه‌کانی دیکه‌دا هه‌ر ئه‌وه‌یه، که تۆ مردووێکی به ئاگایت... (سامان) له‌ناکاو لێت ده‌پرسێت:
_ تۆ کێ له‌گه‌ڵ خۆتدا ده‌هێنیته‌وه ڕیزێرڤ...؟!
ئه‌سته‌مه وه‌ڵامی پرسیارێکی ئاوا بده‌یته‌وه، چونکه هیچ شتێکت لا ڕوون نییه... ئایا تۆ زیندوویت، یان مردوو...؟! ئایا ده‌توانیت ئه‌و که‌سانه‌شت بێنیته‌وه، که له‌ناکاو سه‌ریان هه‌ڵگرتووه...؟! ئایا بۆت هه‌یه یه‌کێک له ئه‌ندازیاره‌که و شاگرده‌که بێنیته‌وه...؟! یان هیچ نه‌بێت بزانیت ژنن یان پیاو و کامیان داپیره‌گه‌وره‌ت یان باپیره‌گه‌وره‌ته...؟!
(سامان) له‌ناو ئه‌و خه‌ڵکه جێت ده‌هێڵێت و به چه‌ند هه‌نگاوێک ده‌گاته ده‌رگای یه‌که‌می مناره‌که... له‌وێ ون ده‌بێت و دوای که‌مێک له‌گه‌ڵ (ست ساماڵ)ی دایکیدا ده‌گه‌ڕێته‌وه... ئه‌وه‌تا وا به ڕووی خۆشه‌وه به‌ره‌و لای قه‌ره‌باڵغییه‌که دێن... خۆ ئه‌و ژنه هیچ شتێکی لێ نه‌گۆڕاوه...!! به هه‌مان سیما و هه‌مان جلوبه‌رگی جارانه‌وه گه‌ڕاوه‌ته‌وه... (سامان) له دووره‌وه به په‌نجه‌ی دۆشاومژه‌ی ئاماژه به تۆ ده‌کات و به دایکیت نیشان ده‌دات... ئه‌و ده‌تبینێت و پێده‌که‌نێت:
_ ڕیزێرڤ، ئه‌وه تۆیت...؟!
ده‌گاته ئاستت و له باوه‌شت ده‌گرێت... چه‌ند جارێک ئه‌ملا و ئه‌ولات ماچ ده‌کات:
_ کێ له‌گه‌ڵ خۆتدا ده‌هێنیته‌وه...؟!
کاتێ تۆ هیچ وه‌ڵامێکت بۆ نادرێته‌وه، ده‌ڵێت:
_ ئێستاش وه‌کو ئه‌وسا هه‌ر شه‌رمنیت...؟! لێره‌ش شه‌رم ده‌که‌یت...؟!
(سامان) قۆڵی له قۆڵی دایکی هه‌ڵده‌کێشێت و به‌ره‌و شاری ده‌باته‌وه... له‌ناکاو ئاوڕ ده‌داته‌وه و پێت ده‌ڵێت:
_ ڕیزێرڤ گیان ئێمه وا ده‌ڕۆین... هه‌ر ده‌بێت کاتێ دایکت ده‌هێنیته‌وه، سه‌ردانمان بکه‌ن... له‌وێ باسی هه‌موو شتێک ده‌که‌ین... به ڕاست بیرم چوو پێت بڵێم، که هه‌ر له شوێنه‌که‌ی خۆمانین.
بیر له گوته‌که‌ی ده‌که‌یته‌وه... بۆچی ده‌ڵێت دایکت و یه‌کێکی دیکه نا...؟! واز له‌وه‌ش بێنه... ئه‌دی بۆچی ده‌ڵێت: ((کاتێ دایکت ده‌هێنیته‌وه)) و ناڵێت: ((ئه‌گه‌ر دایکت ده‌هێنیته‌وه))...؟! ئایا ئه‌و له‌وه دڵنیایه، که تۆ دایکت ده‌هێنیته‌وه...؟! ئه‌دی بۆ ئه‌وسا لێتی پرسی کێ ده‌هێنیته‌وه...؟! سه‌یر ئه‌وه‌یه ماڵیان پێ نازانیت... خۆشت له‌وه تێنه‌ده‌گه‌یشتی بۆچی ده‌ترسایت ماڵه‌که‌یان بدۆزیته‌وه، ئه‌گه‌رچی زۆرجار بۆ بینینی سوێت ده‌بووه‌وه......
تۆ له شوێنی خۆت جووڵه‌ت بۆ ناکرێت و خه‌ڵکیش به‌رده‌وام خه‌ریکی هێنانه‌وه و گه‌ڕاندنه‌وه‌ی مردووی خۆیانن... (دلاوه‌ر) دوای ئه‌وه‌ی (ڤیان)ی بردووه‌ته‌وه، وا به‌ته‌نیا بۆ ماڵ ده‌گه‌ڕێته‌وه... (سامان) و (ست ساماڵ)ی دایکی له‌ناو ئه‌و هه‌موو پرسیار و سه‌رسامییه‌دا جێیان هێشتیت... هه‌ر ده‌توت له ستادیۆمه‌که‌ن و سه‌رجه‌می ئه‌و شتانه له خه‌یاڵی خۆتدا ڕوویان داوه......
وا خه‌ڵک ورده ورده ئه‌و ناوه چۆڵ ده‌که‌ن... له‌وه ده‌چێت ئێره‌ش کاتێکی دیاریکراوی هه‌بێت و تۆ نه‌یزانی... ڕه‌نگه (سامان) هه‌موو ئه‌و شتانه‌ی پێ وتبێتی، به‌ڵام تۆ نه‌تتوانیبێت گوێی لێ بگریت......
ئه‌وه‌تا تۆ به ته‌نیا له به‌رانبه‌ر مناره‌ی چۆڵیدا وه‌ستاویت و دنیاش ورده ورده تاریک دادێت.
ته واو
یانه‌ی رۆشه‌نبیری شه‌قڵاوه
__________________
شاره که م , به ندی دلم , ئه ی باغی مه ن
ره وره وه ی ساوایه تیم , سابلاغی مه ن
دل به هیوات لیده دا , لانکی دلی
تو له وه رزی یادی مه ن دا , سه رچلی
خالید حسامی( هیدی )
|
|
کاربران در حال دیدن موضوع: 1 نفر (0 عضو و 1 مهمان)
|
|
|
مجوز های ارسال و ویرایش
|
شما نمیتوانید موضوع جدیدی ارسال کنید
شما امکان ارسال پاسخ را ندارید
شما نمیتوانید فایل پیوست در پست خود ضمیمه کنید
شما نمیتوانید پست های خود را ویرایش کنید
اچ تی ام ال غیر فعال می باشد
|
|
|
اکنون ساعت 02:32 AM برپایه ساعت جهانی (GMT - گرینویچ) +3.5 می باشد.
|
حالت خطی
