كچان و ژنان له‌ په‌ندی پێشینانی گه‌لاندا

[behnam5555]

كچان و ژنان له‌ په‌ندی پێشینانی گه‌لاندا

( 1 )

ره‌زا شوان ـ نه‌رویچ

له‌ به‌شی یه‌كه‌می په‌نده‌كاندا ، له‌ ژێر ناوی ( كچان و ژنان له‌ په‌ندی پێشینانی كوردیدا) گوڵبژێرێكی كۆمه‌ڵێك په‌ندی پێشینانی كوردیمان بۆ كردبوون كه‌ ده‌رباره‌ی كچان و ژنان وتراون..له‌ هه‌فته‌ی رابردوو له‌ چه‌ند سایتێكی كوردیدا بڵاومان كردوونه‌ته‌وه‌ه‌..له‌ دوای بڵاوكردنه‌وه‌یان.. ئه‌وسا به‌ بیرم هاته‌وه‌، كه‌ سێ ساڵ به‌ر له‌ ئێستا، له‌ یه‌كێك له‌ كه‌ناڵه‌ ئاسمانییه‌ كوردییه‌كاندا ، دیمانه‌یه‌ك له‌گه‌ڵ نووسه‌ر و كه‌له‌پوورناسی گه‌له‌كه‌مان ، كاك
(هه‌رده‌وێڵ كاكه‌یی )دا كرا، كه‌ كتێبێكی چاپكراوی تازه‌ی خۆی پێشاندا به‌ ناونیشانی ( په‌ندی پێشینانی كوردی له‌ ناوچه‌ی كه‌ركوك ) دا..وه‌ك خۆی وتی له‌سه‌ر زاری خه‌ڵكی ناوچه‌ی كه‌ركوكه‌وه‌ وه‌ری گرتوون..ده‌بوایه‌ ناوی كاك هه‌رده‌وێڵ و ناوی كتێبه‌كه‌یشمان بخستایه‌ته‌ ریزبه‌ندی ناوی ئه‌و كتێب و نووسه‌رانه‌ی كه‌ له‌ به‌شی یه‌كه‌مدا ناوم هێناون. به‌ داخه‌وه‌ له‌ بیرم چووبوو.. داوای لێبووردنیش له‌ كاك هه‌رده‌وێڵ كاكه‌یی ده‌كه‌ین.. له‌ راستیشدا له‌ كتێبخانه‌كانی كوردستاندا زۆر بۆ ئه‌م كتێبه‌ گه‌ڕام ، به‌ڵام ده‌ستم نه‌كه‌وت.. به‌ په‌رۆشه‌وه‌م‌ كه‌ بزانم ئه‌و په‌نده‌ كوردیه‌ تایبه‌تمه‌ندییانه‌ی ناوچه‌ی كه‌ركوك كامانه‌ن.

به‌شی دووه‌می په‌نده‌كان ، له‌ ژێر ناوی( كچان و ژنان له‌ په‌ندی پێشینانی گه‌لاندا ) یه‌.
گوڵبژێرێكه‌ له‌ په‌ندی گه‌لان كه‌ ده‌ره‌باره‌ی كچان و ژنان وتراون .. به‌ به‌راورد له‌گه‌ڵ په‌ندی پێشینانی گه‌لاندا ، ده‌توانن ئه‌وه‌ بزانن كه‌ ئه‌و په‌نده‌ كوردییانه‌ی بۆ هه‌مان مه‌به‌ست وتراون ، له‌ چ ئاستێكدان و تا چ راده‌یه‌ك له‌یه‌ك ده‌چن یا له‌یه‌كه‌وه‌ نزیكن.. به‌ لاشتانه‌وه‌ سه‌یر نه‌بێت ، كه‌ كۆمه‌ڵێك په‌ندی پێشینانی كوردی له‌ په‌ندی پێشینانی گه‌لانی تریشدا، به‌ هه‌مان ناوه‌ڕۆك و فۆرم ، یا به‌ جیاوازیه‌كی كه‌مه‌وه‌ هه‌یه‌.. وه‌كو له‌ به‌شی یه‌كه‌مدا باسمان كرد ، كۆمه‌ڵێك په‌ند هه‌یه‌ ده‌توانین ناویان لێبنێن « گوڵوباڵلیزم په‌ند ».
چونكه‌ هه‌ر گه‌لێك خۆی به‌ خاوه‌نی ئه‌م په‌ندانه‌ ده‌زانێ .

ده‌مه‌وێ ئه‌وه‌ش بڵێم ، كۆمه‌ڵێك په‌ندی زه‌ق و ره‌ق و ناشیرین و ناشایسته‌م ده‌رباره‌ی ژنان پشتگۆی خست، كه‌ زۆر نابه‌جێ و ناڕه‌وان..ته‌نها گوزارشت له‌ لێڕوانینی په‌ندبێژ ده‌كه‌ن ، نه‌ من و نه‌ ئێوه‌ش له‌گه‌ڵ ئه‌و بۆچوونانه‌دا نین .. ئافره‌تان گه‌لێ له‌وه‌ مه‌زنتر و رێزدارترن كه‌ به‌ كۆمه‌ڵێك په‌ندی ناشیرینی له‌و شێوانه‌ ، ناشیرین ببن .. ئافره‌ت و پیاو ته‌واوكه‌ری یه‌كترین.. پیاو ، چی بێ و ، چی بڵێ ، هه‌ر له‌ ئافره‌ت له‌ دایك بووه‌.. نكووڵی له‌وه‌ش ناكه‌ین ، كه‌ له‌م سه‌ره‌مه‌شدا، ژنی خراپ و پیاوی خراپیش هه‌ن .

به‌شی دووه‌م ــــ ( كچان و ژنان له‌ په‌ندی پێشینانی گه‌لاندا )

(*) میوه‌ له‌ داری باش و، كچ له‌ دایكی باش هه‌ڵبژێره‌ .
« چینی »
(*) دایك ببینه‌ و دوێته‌ بخوازه‌ .
« كوردی »
(*) ئه‌وه‌ی به‌ ته‌مای كچه‌ بێت ، ده‌بێت قسه‌ی خۆش بۆ دایكی بكات .
« نه‌رویجی »
(*) بڕوانه‌ دایك ، پێش خوازبێنی كردنی كچه‌كه‌ی .
« ئه‌مه‌ریكی »
(*) هه‌موو كچێك جوانه‌ ، ئه‌ی ئه‌و ژنه‌ خراپانه‌ له‌ كوێوه‌ دێن .
« ئوسكۆتله‌ندی »
(*) دایك چۆن بێت ، كچیش وا ده‌بێت .
« نه‌رویجی »
(*)كچ میوانی باوانه‌ .
« كوردی »
(*) كچ خاڵ له‌ ده‌موچاویدا نه‌بێ ، وه‌ك ئاسمانێكی بێ ئه‌ستێره‌یه‌ .
« سویدی »
(*) كچی جوان ، جیازه‌كه‌ی ده‌موچاوێتی .
« ئه‌ڵمانی »
(*) چاودێری كردنی كچی گه‌نج ، ئاسان نییه‌ .
« دانیماركی »
(*) كچان وه‌كو په‌روانه‌ وان ، به‌ ده‌وری رووناكیدا هه‌ڵده‌په‌ڕن .
« نه‌رویجی »
(*) جوانی كچ له‌ قژه‌كه‌ی دایه‌ .
« كوردی »
(*) ئه‌گه‌ر كچێكت لێ هه‌ڵكه‌وت و، زانیت شۆربای خۆش لێده‌نێت، لێی مه‌وه‌سته‌ و خوازبێنی بكه‌ .
« فه‌ره‌نسی »
(*) كچێك له‌ هه‌ڕه‌تی شووكردندا شووی نه‌كردووبێ ، باڵێكی شكاوه‌ .
« چینی »
(*) مه‌رج نییه‌ هه‌رده‌م جوانترین كچ ، باشترین ژنی لێده‌رچێت .
« سویدی »
(*) كچێكی باش ، ژنێكی باشی لێده‌رده‌چێت .
« نه‌رویجی »
(*) بووكی جوان، به‌روبوخچه‌ی كه‌متری ده‌وێ .
« فینله‌ندی »
(*) بووكێ نازت ، به‌قه‌ی جیازت .
« كوردی »
(*) هه‌مووان كچی باشیان هه‌یه‌ ، به‌ڵام كه‌سیان بووكی باشیان نییه‌ .
« نه‌رویجی »
(*) كج قه‌ڵایه‌ ناگیرێ .
« كوردی »
(*) مردنی كچان ، پۆشینه‌ .
« عه‌ره‌بی »
(*) ئافره‌تیش ئاده‌میزاده‌ ، ته‌نها جوانتره‌ .
« سویدی »
(*) پیاو به‌بێ ژن ، وه‌كو ئینجانه‌یه‌ به‌بێ گوڵ .
« پورتوگالی »
(*) ژن كۆڵه‌گه‌ی ماڵه‌ .
« كوردی »
(*) ژن به‌بێ پیاو ، باخچه‌یه‌كه‌ به‌بێ شووره‌ .
« ئه‌ڵمانی »
(*) پیاو به‌بێ ژن ، وه‌كو ماسی یه‌ به‌بێ كلك .
« دانیماركی »
(*) ژنی باش ، نه‌ك هه‌ر هاوسه‌رێكی باشه‌ ، به‌ڵكو كێوێكی زێڕیشه‌ .
« ئیسپانی »
(*) نیشتمانی ژن ، پیاوه‌كه‌یه‌تی .
« رووسی »
(*) ئافره‌ت ژیانێكی پێویسته‌ .
« فه‌ره‌نسی »
(*) ئه‌وه‌ی ژنی هه‌بێ ، گه‌وره‌یه‌كی هه‌یه‌ .
« ئوسكۆتله‌ندی »
(*) ژن نه‌بێت ، ماڵیش نابێت .
« یۆگسلافی »
(*) ژن و ماڵیان وتووه‌ .
« كوردی »
(*) باشترین سامانی پیاو ، ژنی باش و ته‌ندروستی یه‌ .
« ئینگلیزی »
(*) پیاو خانوو ده‌كات ، ژنیش هێلانه‌ .
« فارسی »
(*) پشیله‌ مشكی ده‌ست بكه‌وێ ده‌میاوێنێ، ژن خانووی ده‌ست بكه‌وێ هه‌ڵهه‌ڵه‌ لێده‌دا.
« دانیماركی »
(*) ماڵ به‌بێ ژن ، بیری ئاوه‌ به‌بێ ده‌ولكه‌ .
« ئوسكۆتله‌ندی »
(*) سواڵكه‌ر به‌ ژنه‌كه‌ی ناڵێ له‌ كوێ بووی ، پێی ده‌ڵێ چیت هێناوه‌ .
« عه‌ره‌بی »
(*) پیاو پاره‌ په‌یدا ده‌كا ، ژنیش پارێزگاری لێده‌كا .
« ئیتالی »
(*) ده‌وارێك به‌بێ ژن ، وه‌كو كه‌مانێكه‌ به‌بێ تار .
« رۆمانی »
(*) ژن به‌بێ مێرد ، ئه‌سپێكه‌ به‌بێ لغاو .
« یۆنانی »
(*) ئافره‌ت و پیاوی ئیشكه‌ر ، سه‌وداكردنیان زه‌حمه‌ته‌ .
« ژاپۆنی »
(*) زێڕ به‌ ئاگر ، ژن به‌ زێڕ ، پیاویش به‌ ژن ، تاقی ده‌كرێنه‌وه‌ .
« ئه‌مه‌ریكی »
(*) ژن به‌ گوێگرتن و ، پیاویش به‌ سه‌یركردن ، سه‌رسام ده‌بن .
« فینله‌ندی »
(*) كه‌ خوا ئافره‌تی دروست كرد ، یه‌كه‌مین پرۆژه‌ی خۆی پێشكه‌ش كرد .
« سویدی »
(*) هه‌رده‌م ژنان ، به‌ قژه‌وه‌ جوانن .
« دانیماركی »
(*) ئه‌سپ له‌ ماڵه‌ ده‌وڵه‌مه‌ند بكڕه‌ ، ژنیش له‌ ماڵه‌ هه‌ژار بخوازه‌ .
« ئیتالی »
(*) خانمی راسته‌قینه‌ی ماڵ له‌ هه‌مان كاتدا ، كۆیله‌یه‌ و خانمیشه‌ .
« بۆسنی »
(*) پێڵاوی پاژنه‌به‌رز ئافره‌ت دروستی كرد ، نه‌یویست له‌ ناوچه‌وانه‌وه‌ ماچ بكرێ.
« ئه‌فریقی »
(*) خواردنه‌وه‌ و ژن ، پیاو له‌ڕێ ده‌رده‌كه‌ن .
« دانیماركی »
(*) ئافره‌ت و پاره‌ ، پیاو ون ده‌كه‌ن .
« فه‌ره‌نسی »
(*) ئه‌وه‌ی ژنێكی باش و شۆربایه‌كی خۆشی هه‌بێ ، له‌وه‌ زیاتر چیتری ناوێ .
« رووسی »
(*) ئه‌گه‌ر به‌ ژن بوترێت له‌ ئاسمان شاییه، هه‌ڵده‌سێ و په‌یژه‌ی بۆ به‌رزده‌كاته‌وه ‌.‌
« عه‌ره‌بی »
(*) سه‌رمایه‌ی ژیان ، ژن و ددانه‌ .
« كوردی »
(*) مێردی باش ، ژنی باش دروست ده‌كا .
« ئوسكۆتله‌ندی »
(*) ئافره‌ت له‌ زمان و فرمێسكه‌كانی زیاتر ، هیچ چه‌كێكی تری نییه‌ .
« ئینگلیزی »
(*) ئافره‌ت كه‌ نه‌توانێت تۆڵه‌ بستێنێته‌وه‌ ، ده‌ست به‌ گریان ده‌كا .
« پۆڵۆنی »
(*) ئافره‌ت له‌ یه‌ك كاتدا، حه‌فتاوحه‌وت زمانی هه‌یه‌ .
« ئیسپانی »
(*) ژنهێنان هیوای هه‌موو پیاوێكه‌ .
« نه‌رویجی »
(*) زوو ژنهێنان و زوو له‌ خه‌و هه‌ستان ، پیاو لێیان په‌شیمان نابێته‌وه‌ .
« فینله‌ندی »
(*) ژن هاوردووه‌كان خه‌میان زۆره‌ ، به‌ڵام گه‌نجان خه‌میان زیاتره‌ .
« ژاپۆنی »

مالپه ری کوردژین

[behnam5555]

كچان و ژنان له‌ په‌ندی پێشینانی گه‌لاندا

( 2 )

ره‌زا شوان ـ نه‌رویچ

(*) هه‌موو گه‌نجینه‌ی جیهان ، ناگاته‌ ، ئافره‌تێكی داوین پاك .
« عه‌ره‌بی »
(*) سێ چین نابێت تووڕه‌ بكرێن : كاربه‌ده‌ستی ده‌وڵه‌ت ، كرێكار ، بێوه‌ژن .
« چینی »
(*) ژن ده‌وڵه‌مه‌ندیش بێ ، پیاوی پێویسته‌ .
« ئه‌لبانی »
(*) هێزی ژن له‌ زماندایه‌ .
« زنجی »
(*) ده‌می ژن ، هه‌رگیز پشوودانی نییه‌ .
« ئه‌مه‌ریكی »
(*) زمانی ژن سێ گرێ یه‌ ، به‌ڵام ده‌توانێت پیاوێك بكوژێت كه‌ شه‌ش پێ درێژ بێ .
« ژاپۆنی »
(*) دڕك تیژه‌ ، زمانی ئافره‌ت تیژتره‌ .
« ئه‌ڵمانی »
(*) زمانی ئافره‌ت ، چه‌قۆی دوو ده‌مه‌ .
« رۆمانی »
(*) ئافره‌ت قژی درێژه‌ ، به‌ڵام زمانی درێژتره‌ .
« رووسی »
(*) زمانی ژن خه‌نجه‌ره‌ ، هه‌رگیز ژه‌نگ ناكات .
« سۆمالی »
(*) وت وته‌ی ژنان ، كوژ كوژه‌ی پیاوان .
« كوردی »
(*) دوا ئه‌ندام كه‌ له‌ پیاودا ده‌مرێ دڵێتی ، له‌ ژندا زمانێتی .
« چینی »
(*) ژن چوار چه‌كی هه‌یه‌ : زمان ، نینۆك ، فرمێسك ، بوورانه‌وه‌ .
« ئیتالی »
(*) سێ شت تیژن ، دڕك ، توتڕك ، زمانی ژنی ده‌مه‌وه‌ر .
« دانیماركی »
(*) ژنان شمشێره‌كانیان له‌ ده‌میان دایه‌ .
« ئه‌ڵمانی »
(*) ئافره‌ت به‌ ره‌وشتی ، نه‌ك به‌ جلوبه‌رگی .
« عه‌ره‌بی »
(*) ئه‌وه‌ی ژنێكی پاره‌دار بخوازێ ، گوێ به‌ ته‌مه‌نی نادات .
« نه‌رویجی »
(*) دنیا له‌سێ شتدا كۆبۆته‌وه‌ : ئاو ، ئاگر ، ئافره‌ت . ئاو ده‌خنكێنێ ، ئاگر ده‌سووتێنێ ، ئافره‌تیش شێتت ده‌كات .
« توركی »
(*) سێ شت پیاو له‌ ماڵ ده‌رده‌په‌ڕێنن ، جگه‌ره‌كێشان ، باران ، ژنی خراپ .
« لاتینی »
(*) كه‌ چرا لاببرێت ، هه‌موو ژنان له‌یه‌ك ده‌چن .
« یۆنانی »
(*) له‌ رۆژی رووناكدا ، زێڕ و كووتاڵ و ژن هه‌ڵبژێره‌ .
« ئیسپانی »
(*) ئه‌گه‌ر رازت به‌ ژنێكی لاڵیش بسپێری ، ئاشكرای ده‌كا .
« ئینگلیزی »
(*) پیاو به‌بێ ژن ، وه‌كو ئه‌و پیاوه‌ وایه‌ كه‌ بۆ زستان كڵاوی فه‌رووداری نه‌بێت .
« رووسی »
(*) پیاو به‌بێ ژن ، سه‌رگه‌ردان ده‌بێ .
« كوردی »
(*) پیاو كه‌ ژنی نه‌هێنابێ ، گله‌یی له‌ چی كا .
« دانیماركی »
(*) سێبه‌ری پیاوێك ، نه‌ك سێبه‌ری دیوارێك .
« عه‌ره‌بی »
(*) بۆ هه‌ر جێگایه‌ك بڕۆی ، ژن له‌گه‌ڵ خۆتدا به‌ره‌ .
« ئیڕله‌ندی »
(*) پیاو به‌بێ ژن ، وه‌كو خانوویه‌كی سه‌رنه‌گیراوه وایه‌ .‌
« فینله‌ندی »
(*) گوێگرتن له‌ گریانی ژنێكی باش ، باشتره‌ له‌ پێكه‌نینی ژنێكی خراپ .
« نه‌رویجی »
(*) ژن سابوونی پیاوه‌ .
« فه‌ره‌نسی »
(*) ژن هه‌سانی پیاوه‌ .
« كوردی »
(*) له‌ هه‌ڵبژاردنی ژندا پله‌یه‌ك خوارتر هه‌ڵبژێره‌ ، له‌ هاوڕێتیدا ‌پله‌یه‌ك به‌رزتر .
« چینی »
(*) له‌ پێش ژنهێنان چاوه‌كانت باش بكه‌ره‌وه‌ ، له‌ دوای ژنهێنان با نیوه‌ كراوه‌ بن .
« ئه‌مه‌ریكی »
(*) له‌ پێش ژنهێنان چاوه‌كانت بكه‌ره‌وه‌ ، له‌ دوای ژنهێنان چاوه‌كانت بنووقێنه‌ .
« عه‌ره‌بی »
(*) سكی دایك باخچه‌یه‌كه‌ ، هه‌موو میوه‌یه‌ك ده‌گرێت .
« ئوسكۆتله‌ندی »
(*) پیاو به‌بێ ژن سه‌رێكی بێ له‌شه‌ ، ژنیش به‌بێ پیاو له‌شێكی بێ سه‌ره .
« ئه‌ڵمانی »
(*)‌ ژن به‌بێ پیاو هاره‌بێ ، پیاو بێ ژن هه‌ژاره‌ بێ .
« كوردی »
(*) بڕوات به‌ هه‌تاوی زستان و ، به‌ دڵی ئافره‌ت نه‌بێ .
« بولگاری »
(*) جوانترین چاو و درۆزنترین چاو ، چاوی ئافره‌ته‌ .
« به‌رازیلی »
(*) دڵی ئافره‌ت ، له‌ چاوه‌كانی ده‌ پیاو زیاتر ده‌بینێ .
« سویدی »
(*) ژنخوازێكی دڵ لاواز ، ژنێكی جوانی ده‌س ناكه‌وێ .
« ئوسترالی »
(*) ژنان و شووشه‌ ، هه‌رده‌م له‌ مه‌ترسیدان .
« ئیسپانی »
(*) ژنان پیاوان ده‌ناسن ، به‌ڵام ته‌نها ژنانن كه‌ ژنان ده‌ناسن .
« ژاپۆنی »
(*) پیاو به‌ فێڵ ، ژن به‌ مه‌كر .
« عه‌ره‌بی »
(*) پیاوانن خانوو دروست ده‌كه‌ن ، ژنانن ماڵداری ده‌كه‌ن .
« دانیماركی »
(*) ژن و شووتی ، به‌ ڕێكه‌وت باش ده‌رده‌چن .
« توركی »
(*) مایین به‌ سواره‌كه‌ی ، ژنیش به‌ مێرده‌كه‌ی .
« عه‌ره‌بی »
(*) ژن هه‌رگیز دانی خێر به‌ ژندا نانێ .
« چینی »
(*) هه‌موو ژنێك ، ژن نییه‌ .
« ژاپۆنی »
(*) ژن هه‌یه‌ ژیانه‌ ، ژنیش هه‌یه‌ ژانه‌ .
« كوردی »
(*) ژن قژی درێژه‌ ، به‌ڵام بیری كورته‌ .
« رووسی »
(*) هه‌ر كاتێك سێ ئافره‌ت هاوڕابن، ئه‌ستێره‌كان به‌ رۆژی رووناك ده‌دره‌وشێنه‌وه‌.
« هیندی »
(*) پیاو جیهان به‌ڕێوه‌ ده‌با ، ژنیش پیاو به‌ڕێوه‌ ده‌با .
« ئیسپانی »
(*) ئه‌و پیاوه‌ی ژنێكی منداڵكار بخوازێ ، شه‌یتان پێ پێ ده‌كه‌نێ .
« ئه‌ڵمانی »
(*) ئه‌گه‌ر شه‌یتان نه‌توانێ بچێته‌ جێگایه‌ك ، ژن ده‌نێرێ .
« چینی »
(*) شه‌یتان ژنی قووت دا ، به‌ڵام پێی هه‌رس نه‌كرا .
« پۆڵه‌ندی »
(*) شه‌یتان مامۆستای پیاوه‌ ، به‌ڵام قوتابی ئافره‌ته‌ .
« ژاپۆنی »
(*) ژن له‌ شه‌یتان ، شه‌یتانتره‌ .
« كوردی »
(*) ئه‌وه‌ی به‌ شه‌یتان ناكرێ ، به‌ ژن ده‌كرێ .
« ئه‌ڵمانی »
(*) پیاو ئاگره‌ ، ئافره‌ت داره‌ ، شه‌یتانیش هه‌وایه‌ .
« فه‌ره‌نسی »
(*) شه‌یتان نازانێ ، ژنان له‌ كوێ چه‌قۆ تیژ ده‌كه‌ن .
« لاتینی »
(*) ژن له‌ شه‌یتان فێڵبازتره‌ .
« هیندی »
(*) ئافره‌ت له‌ شه‌یتان زۆرتر ده‌زاێ .
« ئیتالی »
(*) شه‌یتان ده‌ كاتژمێری ده‌وێ تا پیاوێك بخه‌ڵه‌تێنێت ، به‌ڵام ژنێك یه‌ك كاتژمێری به‌سه‌ بۆ ئه‌وه‌ی ده‌ پیاو له‌ رێ ده‌ربكات .
« ژاپۆنی »
(*) له‌ مار دڵنیابه‌ ، به‌ڵام له‌ ژن دڵنیا مه‌به‌ .
« عه‌ره‌بی »
(*) ئه‌و ئافره‌ته‌ی دوو پیاوی خۆش بوێ ، درۆ له‌گه‌ڵ هه‌ردووكیاندا ده‌كا .
« پورتوگالی »
(*) ئه‌و ژنه‌ی حه‌زی له‌ جل شۆرینه‌ ، له‌ هیچی كه‌م نییه‌ ، ته‌نها ئاو نه‌بێ .
« سویسری »
(*) پاره‌ت هه‌بێ ، ده‌توانی كچی سوڵتانیش بخوازی .
« عه‌ره‌بی »
(*) من خانم تۆ خانم ، كێ مانگاكانمان بۆ بدۆشێ .
« سربی »
(*) مریشك و ژن ، له‌ ماڵه‌وه‌ دووركه‌ونه‌وه‌ ون ده‌بن .
« ئیسپانی »
(*) ئه‌گه‌ر یارت یار نییه‌ ، وازلێهێنانی شووره‌یی نییه‌ .
« فارسی »
(*) كه‌ ژنه‌كه‌ له‌سه‌ر په‌یژه‌دا خل بۆوه‌، پیاوه‌كه‌ی وتی: گه‌شتێكی خۆشت بۆ ده‌خوازم .
« سویدی »
(*) بۆ ئه‌وه‌ی هاوسه‌رگیری سه‌ركه‌وتووبێ ، ده‌بێ پیاوه‌ كه‌ڕ و ژنه‌ كوێر بێ .
« دانیماركی »
(*) له‌ پێناوی پاره‌دا ژن مه‌خوازه‌ ، قه‌رزكردنی ئاسانتره‌ .
« ئوسكۆتله‌ندی »
(*) له‌ دوو كه‌س نزیك مه‌به‌ره‌وه‌ ، ئافره‌تێك هه‌موو سامانه‌كه‌ی جوانییه‌كه‌ی بێ ، پیاوێكیش هه‌موو جوانییه‌كه‌ی سامانه‌كه‌ی بێ .
« هیندی »
(*) ژنی سه‌رباز ، نه‌ ژنه‌ و نه‌ بێوه‌ژنه‌ .
« رووسی »
(*) نه‌ پشت به‌ دیواری لار و ، نه‌ به‌ ئافره‌ت ببه‌سته‌ .
« چیكی »
(*) سواڵكه‌ره‌ و ناوی « خاتوو به‌ناز »ه‌ .
« عه‌ره‌بی »
(*) سه‌گ بۆ پیاو ، پشیله‌ بۆ ژن .
« ئینگلیزی »
(*) پێویسته‌ سوپاسی كچان و ژنان بكرێن ، ئه‌مه‌ راست بێ یا ناڕاست .
« ئه‌ڵمانی »
(*) ئه‌وه‌ی به‌ خراپی ناوی ژنان ده‌هێنێ ، هیچ له‌ باره‌ی دایكییه‌وه‌ نازانێ .
« نه‌رویجی »
(*) ئه‌گه‌ر دوو ئافره‌ت به‌یه‌ك گه‌یشتن ، ئه‌وا قسه‌یان نابڕێته‌وه‌ ، ئه‌گه‌ر بوون به‌ سێ شه‌ڕیان نابڕێته‌وه‌ .
« چینی »
(*) له‌ ته‌نگانه‌دا ، ژنان له‌ پیاوان ژیرترن .
« عه‌ره‌بی »
(*) ره‌گی ناكۆكییه‌كان سێ شت : زێڕ ، زه‌وی ، ژن .
« هیندی »
(*) دایك و كچ شه‌ڕیان كرد ، گه‌وج بڕوای پێیان كرد .
« كوردی »
(*) هه‌ردم ژنان به‌ قژه‌وه‌ جوانن .
« دانیماركی »
(*) هاوسه‌رگیری، جارێك پێویستییه‌ ، دووه‌مین جار گه‌مژه‌ییه‌ ، سێیه‌مین جار شێتییه‌.
« هۆڵه‌ندی »
(*) ئه‌گه‌ر ژن تووشی گوناه بێت .. پیاویش بێ گوناه نییه‌ .
« ئیتالی »
(*) پیاو رووباره‌ ، ژن ده‌ریایه‌ .
« كوردی »
(*) خشڵی پیاو ئه‌ده‌به‌ ، خشڵی ژن زێڕه .
« عه‌ره‌بی »
(*) بازنگی زێڕی له‌ ده‌سته‌ ، سكیشی له‌ برسا ده‌قۆڕێنێ .
« هیندی »
(*) به‌سزمان ئه‌و ئافره‌ته‌یه‌ كه‌ زمان له‌ ده‌میدا نییه‌ ، به‌خته‌وه‌ریش ئه‌و پیاوه‌یه‌ كه‌ ده‌یهێنێ .
« ئوسكۆتله‌ندی »
(*) چاوه‌كانی ژن ده‌ریاچه‌یه‌كی وشكن، به‌ڵام ده‌توانن مه‌زنترین مه‌له‌وان زان بخنكێنن.
« سووری »
(*) ئافره‌ت ئه‌گه‌ر بۆ له‌ سێداره‌دانیش ببرێت ، داوای ئه‌وه‌ ده‌كات ، كه‌ مۆڵه‌تێكی بده‌نێ تاكو خۆی بڕازێنێته‌وه‌ .
« ئینگلیزی »
(*) پیاوه‌یان ده‌برد بۆ له‌ سێداره‌دان ، ژنه‌ وتی له‌ بیرت نه‌چێ كل و كلدان .
« كوردی »
(*) وریابه له‌و ژنه‌ی له‌ چاكه‌ی خۆی ده‌دوێ، له‌و پیاوه‌ش له‌ راستگۆیی خۆی ده‌دوێ.
« فه‌ره‌نسی »
(*) خۆشه‌ویستیت به‌ ژنه‌كه‌ت ببه‌خشه‌ ، رازیشت به‌ دایكت بسپێره‌ .
« ئیڕله‌ندی »
(*)‌ لای دایكی گڕ بوو ، لای ژنه‌كه‌ی كڕ بوو .
« عه‌ره‌بی »
(*) ئه‌وه‌ی ژنێكی جوانی هه‌بێت ، پێویستی به‌ دوو چاو زیاتره‌ .
« ئۆسكۆتله‌ندی »
(*) ده‌كرێ دێو ماڵی بكرێ ، به‌ڵام ژنی تووڕه‌ ماڵی ناكرێ .
« نه‌رویجی »
(*) پیاو دیاری ی خوایه‌ بۆ ژن .
« سویدی »
(*) ئه‌وه‌ی دایكی خۆش نه‌وێ ، ناچاره‌بێت كه‌ خه‌سووی خۆش بوێ .
« فینله‌ندی »
(*) ژن سێبه‌ری پیاوه‌ ، پێویسته‌ دوای بكه‌وێت ، نه‌ك به‌ڕێوه‌ی به‌رێت .
« ئه‌مه‌ریكی »
(*) ئه‌وه‌ی هه‌موو شتێك بۆ ژنه‌كه‌ی ده‌گێڕێته‌وه‌ ، تازه‌ زاوایه‌ .
« ئوسكۆتله‌ندی »
(*) هاوسه‌رگیری قه‌ڵایه‌كی گه‌ماروو دراوه‌، ئه‌وانه‌ی له‌ ناو قه‌ڵاكه‌دا، ده‌یانه‌وێ بێنه‌ ده‌ره‌وه‌ ، ئه‌وانه‌ی له‌ ده‌ره‌وه‌شدان ، ده‌یانه‌وێ بچنه‌ ناو قه‌ڵاكه‌وه‌ .
« چینی »
(*) ژنهێنان ، شه‌ڕێكه‌ ده‌بێ بكرێ .
« عه‌ره‌بی »
(*) ئه‌گه‌ر به‌ دوای ئافره‌تێكی بێ هه‌ڵه‌دا بگه‌ڕێی ، ئه‌وه‌ هه‌ر به‌ ره‌به‌نی ده‌مێنیته‌وه‌ .
« توركی »
(*) ئافره‌ت ئابڕووی پیاوه‌ .
« سویدی »
(*) دوو ژن له‌ ماڵێكدا ، وه‌ك دوو پشیله‌ وان كه‌ مشكێكیان ده‌ست كه‌وتووبێ .
« دانیماركی »
(*) ژن ئازارێكی هه‌میشه‌یه‌ .
« یۆنانی »
(*) ژن وه‌كو مانگ وایه‌ ، رووناكی وه‌رده‌گرێ .
« ئینگلیزی »
(*) ژن له‌ هه‌فته‌یه‌كدا ، رۆژێك گوێ له‌ ئامۆژگاری ده‌گرێت ، به‌ڵام نازانرێت كام رۆژه.
« نه‌رویجی »
(*) ته‌نها هه‌ر چل ساڵ جارێك ، ژنه‌كه‌ت چی وت به‌ قسه‌ی بكه‌ .
« توركی »
(*) ئه‌گه‌ر ژنه‌كه‌م له‌گه‌ڵمدا بێ ، جیهان به‌ په‌نجه‌یه‌ك ده‌سوڕێنمه‌وه‌ .
« عه‌ره‌بی »
(*) بۆ تێگه‌یشتن له‌ پیاو ، ژن بخوێنه‌وه‌ .
« فه‌ره‌نسی »
(*) باشترین شت كه‌ پیاو هه‌یبێت ژنێكی باشه‌ ، خراپترین شتیش كه‌ پیاو ‌ تووشی بێت ژنیكی خراپه‌ .
« ئه‌ڵمانی »
(*) ژن دوو جار به‌ لای پیاوه‌وه‌ خۆشه‌ویسته‌ ، ئه‌و رۆژه‌ی ماره‌ی ده‌كا ، ئه‌و رۆژه‌ش كه‌ له‌ گۆڕی ده‌نێ .
« رووسی »
(*) ماڵ به‌ بوونی زه‌وی بنیات نانرێ ، به‌ڵكو به‌ بوونی ژن .
« ئیسپانی »
(*) پیاو به‌بێ ژن ، ژنیش به‌بێ پیاو ، هه‌ڵناكه‌ن .
« كوردی »
(*) پیاو كوڕی ژنه‌ .
« رووسی »
(*) ژن یا ده‌بێت ده‌سه‌ڵاتدار بێ .. یا خزمه‌تكار بێ .
« یۆنانی »
(*) ژنی ژنانه‌ ، داینێ له‌ دیوه‌خانه‌ .
« كوردی »

مالپه ری کوردژین