جێ پێ *
خۆر
بەسەر سینگی ساماڵا هەنگاوی نا و
دوور كەوتەوە،
ئەو ڕێچكەیەی پیاتێپەڕی
بوو بە گوڵجاڕی ئەستێرە و
كانیی زوڵاڵی كازیوە.
#
كە تۆ هاتی!
ڕۆحم تێكەڵ خیز و خۆڵی ڕێگاكەت كرد
كاتێ پێت نا بەسەر هەستی كەسیرەمدا و
دوور كەوتییەوە،
ڕێگە و كۆڵان گەشانەوە
بوون بە ڕووباری زریوە.
* زللە *
پیرە چەقەڵی تامەزرۆی كەلاك!
لمبۆز چەپەڵی دڵڕەشی ناپاك!
تا گەیشتیتە ژوانی گەلە گورگ
بۆ ئاخنینی گەڵ و گەدە و ورگ
دەمت نایە چەند جۆگەلەی خوێن و
كانیاوی ئەسرین؟
لمبۆزت وەردا لە چەند دڵی پڕ گوڵاڵەی برین؟
بۆ هەڵمژینی بۆنی ڕیچەیەك
چەند چیا ئێسكی شەهیدت كورۆشت؟
بۆ هەڵمەقووتی بەردەماوێكی دێڵەگورگی پیر
مێشكی چەند هەزار مناڵت فرۆشت؟!
* دڵەدوا *
ئەو ئەستێرەی
لەفرمێسكی زەرد و سڕی
مانگەشەودا دەتلاوە
هەناسەی (با) و پەنجەی تیشك و
چاوی ئاسمان
دیتوویانە
شۆڕەژنێكی چاوگەشی
_ گڕی ئەوین هەڵكزاندووی_
دڵ دۆڕاوە،
كوێرانە خۆی لەباوەشی
شەوەزەنگ مارە كردووە و
دڵیشی لە ژوانی تیشكا بەجێماوە،
بۆیە دایم دڵەدوایە و لە پەنجێرەی
دڵی تەم لێ نیشتووی خەمی شەوانەوە
چاوێكی هەر لە هەتاوە!
ئه‌مين گه‌رديگلاني
بەهاری(1382)